لکھیم پور کھیری واقعہ کے خلاف مہاوکاس اگھاڑی میں شامل حلیف جماعتوں کا مہاراشٹر بند کا مشترکہ فیصلہ، شیخ آصف نے بی جے پی ہٹاؤ، دیش بچاؤ کا نعرہ دیا
مالیگاؤں: اترپردیش کے لکھیم پور کھیری میں پیش آنے والے شرمناک واقعہ کی ملک بھر کی انصاف پسند عوام کی جانب سے مذمت کا سلسلہ جاری ہے۔مہا وکاس اگھاڑی حکومت نے اس واقعہ کی مذمت کرتے ہوئے 11 اکتوبر 2021 بروز پیر مشترکہ طور پر بند کا اعلان کیا ہے۔
آج مالیگاؤں شہر راشٹروادی کانگریس پارٹی کی جانب سے رشٹریہ وادی بھون میں منعقد پریس کانفرنس میں ضلع صدر شیخ آصف نے مہاوکاس اگھاڑی کے اس مشترکہ فیصلہ کی تفصیلات پیش کرتے ہوئے شہر کی عوام اور صنعت کاروں سے اس بند میں تعاون کرنے کی اپیل کی ہے۔
شیخ آصف نے کہا کہ اترپردیش کے لکھیم پور میں کسان طویل مدت سے متنازعہ زرعی قوانین کے خلاف سراپا احتجاج بنے ہوئے ہیں۔حال ہی میں اترپردیش کے وزیر داخلہ برائے امورِ مملکت اجے شرما کے بیٹے نے اپنی گاڑی سے کسانوں کو روند ڈالا، جس کے نتیجے میں متعدد کسان ہلاک ہوگئے جبکہ متعدد زخمی ہوئے۔اس طرح کی واردات اب تک نہیں دیکھی گئی۔ یہ صرف کسانوں کا مسئلہ نہیں ہے بلکہ ہندوستان میں بسنے والے ہر شہری کا مسئلہ ہے۔ اگر کسان بچے گا تو دیش بچے گا۔اگر سیاہ زرعی قوانین واپس نہیں لئے گئے تو مہنگائی بڑھے گی اور براہ راست غریب متاثر ہوگا۔اس لئے ہمارا فرض بنتا ہے کہ آج کسانوں کے ساتھ کھڑے ہوں ان کی حمایت میں شہر کے کاروبار اور دکانیں بند رکھیں۔
این سی پی ضلع صدر شیخ آصف نے کہا کہ دیش کو بچانے اور بی جے پی کو ہٹانے کیلئے سب کو مل کر اس بند میں شامل ہونا چاہیے۔انہوں نے عوام سے اپیل کی کہ 11 اکتوبر پیر کے روز صبح 11 بجے سے شام 7 بجے تک تمام کاروبار اور دکانیں رضاکارانہ طور پر بند رکھیں۔این سی پی کے عہدیداران اور کارکنان اس بند کا کامیاب بنانے کیلئے شہر کے اہم مقامات اور سڑکوں پر گشت کریں گے اور لوگوں سے اپنا کاروبار اور دکانیں بند رکھنے کی درخواست کریں گے۔
شیخ اصف نے کہا کہ حالانکہ اسکول، کالجس، اسپتال اور میڈیکل جاری رکھے جائیں گے۔بند کے روز نیا بس اسٹینڈ کے پاس انتظامیہ کو طلب کیا جائے اور ان سے درخواست کی جائے گی کہ وہ بس اسٹینڈ کے پاس آکر مطالباتی میمورنڈم قبول کریں۔
اس کے علاوہ سنجئے گاندھی نرادھار اسکیم کمیٹی کی صدرات ملنے پر ضلع راشٹریہ وادی کانگریس پارٹی کے صدر شیخ آصف نے شکیل جانی بیگ کو مبارکبادپیش کی۔ہفت روزہ بیباک کی ایک خبر کے مطابق
مرکزی حکومت کی منظور شدہ و نافذ العمل سنجئے گاندھی نرادھار اسکیم کے تحت بزرگوں اور بیوہ، معذور افراد کو گرانٹ (فنڈ)فراہم کیا جاتا ہے ۔اس کیلئے ایک مشترکہ کمیٹی کا قیام کیا گیا جس میں سرکاری افسران و غیر سرکاری (سماجی خدمتگار) شخصیات کو شامل کیا گیا ہے ۔تفصیلات کے مطابق ناسک ضلع کلکٹر سورج مانڈھرے نے اس ضمن میں ایک اپوائنٹ مینٹ لیٹر جاری کرتے ہوئے حکم صادر کیا ہے کہ ناسک ضلع رابطہ وزیر و رسد و خوراک اور صارفین کے تحفظ کے وزیر چھگن بھجبل کی سفارش اور مہاراشٹر سرکار کے فیصلہ نمبر 3،4 کے مطابق مالیگاؤں شہر اور تعلقہ کیلئے سنجے گاندھی نرادھار گرانٹ اسکیم کمیٹی کے مطابق صدر، ممبران اور نائب سیکریٹری کے عہدوں پر تقرری کا عمل مکمل کیا گیا ہے۔ جن میں سرکاری حکام اور غیر سرکاری افراد کو شامل کیا گیا ہے ۔سماجی میدان میں کام کرنے والے شعبہ سے اس کمیٹی کے صدر کیلئے شکیل جانی بیگ کو صدر نامزد کیا گیا جبکہ پسماندہ طبقات ایس سی ۔ایس ٹی سےپنٹو اشوک ہیرے کو رکن،غیر سرکاری خواتین شعبہ سے محترمہ تسلیمہ زین العابدین کو رکن، او بی سی شعبہ سے عبدالقیوم عبدالحفیظ اور ونایک نارائن کھیرنار کو رکن نامزد کیا گیا ہے ۔اشوک نارائن دیشمکھ کو بطور رکن اوپن کیٹیگری سے تقرر کیا گیا ۔اسکے علاوہ معذور طبقہ سے نمائندگی کرنے والے آصف خان اجمل خان کو رکن اور انیل بابو راؤ کو تعلقہ میں سماجی خدمات انجام دینے کے شعبہ سے نامزد کیا گیا ہے ۔اسی طرح سینئر سٹیزن شعبہ سے شیخ شبیر شیخ موسیٰ کو رکن اور مالیگاؤں میونسپل کارپوریشن کے متعلقہ پربھاگ آفیسر کو بطور رکن تقرر کیا گیا ہے اسکے علاوہ سنجئے نرادھار کمیٹی میں تحصیلدار کو نائب سیکرٹری اور نائب تحصیلدار کو رکن مقرر کیا گیا ہے ۔ضلع کلکٹر سورج مانڈھرے نے ہدایت دیتے ہوئے کہا کہ اس آرڈر کے ساتھ حکومتی فیصلے 2018 اور 2019 کے مطابق درج تمام شرائط کی پابندی سے عمل آوری کی جائے ۔موصوف نے اس آرڈر کی ایک کاپی وزیر رسد و خوراک، چھگن بھجبل، چیف سیکرٹری سماجی انصاف محکمہ منترالیہ ،ڈویژنل کمشنر ناسک رینج ، پرانت آفیسر ، تحصیلدار ،اور نئے تقرر کئے گئے صدر و اراکین کمیٹی کو روانہ کی ہے ۔
