شاہ رخ خان کے بیٹے آرین خان ڈرگس معاملے میں گرفتار

کروز شپ پر جاری ڈرگس پارٹی پر این سی بی کا چھاپہ، آرین خان سمیت 8 لوگوں سے تفتیش

سنیچر کے روز ممبئی سے گوا جانے والے ایک کروز شپ نارکوٹکس کنٹرول بیورو کے افسران نے چھاپہ مارا۔این سی بی کو کروز پر ڈرگس پارٹی ہونے کی خفیہ اطلاع موصول ہوئی تھی۔جس کے بعد افسران حلیہ بدل کر پارٹی میں شامل ہوئے اور ڈرگس پارٹی کا پردہ فاش کیا۔واضح رہے کہ اس پارٹی میں بالی ووڈ سپر اسٹار شاہ رخ خان کے بیٹے آرین خان بھی موجود تھے۔این سی بی نے آرین خان کو بھی حراست میں اور این سی بی دفتر میں ان سے تفتیش کی جس کے بعد انہیں گرفتار کرلیا گیا ہے۔

اس کروز شپ ڈرگس پارٹی میں شامل تمام لوگوں کے نام سامنے آگئے جنہیں این سی بی نے حراست میں لیا۔ان میں آرین خان کے علاوہ منمن دھاموچہ، نوپور ساریکا، اشمت سنگھ، مہک جیسوال، وکرانت چھوکر، گومت چوپڑا اور ارباز مرچنٹ شامل ہیں۔

یہ بھی پڑھیں: ۔۔۔پاکستان کے مشہور کامیڈین عمر شریف کا انتقال

ڈرگس معاملے میں بیٹے کے پھنسنے کے بعد شاہ رخ خان کے تعلق سے کہا جارہا ہے کہ وہ اپنی فلم پٹھان کی شوٹنگ ملتوی کرسکتے ہیں۔شاہ رخ خان کو فلم کی شوٹنگ کیلئے اسپین جانا تھا۔ایسا امکان ظاہر کیا جارہا ہے کہ شاید اب فلم کی شوٹنگ رد کی جاسکتی ہے۔واضح رہے کہ شاہ رخ نے اب تک اس معاملے پر کوئی بیان نہیں دیا ہے۔بتایا جارہا ہے کہ وہ مسلسل این سی بی افسران کے رابطے میں ہیں۔جبکہ سنیل شیٹی نے آج تک سے بات چیت کے دوران آرین سے متعلق کہا کہ جہاں جہاں چھاپہ مارا جاتا ہے بہت سارے لوگوں کو حراست میں لیا جاتا ہے۔ہم مان کر چلتے ہیں کہ اس بچے نے منشیات کا استعمال کیا ہوگا لیکن ابھی کارروائی جاری ہے اس بچے کو سانس لینے کا موقع دیں۔جب ہماری انڈسٹری میں کچھ ہوتا ہے تو میڈیا ٹوٹ ٹوٹ پڑتی ہے۔بچوں کو موقع دیں۔سچ سامنے آنے دیجئے۔وہ بچہ ہے اس کا خیال رکھنا ہماری ذمہ داری ہے۔

اس معاملے میں دہلی این سی بی سے ممبئی این سی بی کو اطلاع موصول ہوئی تھی۔جس کے بعد کارروائی کی گئی۔دہلی کے کچھ منتظمین نے اس پارٹی کے انتظامات کئے تھے جو پہلے ہی این سی بی کے رڈار پر تھے۔بتایا جارہا ہے کہ جتنے لوگوں کو حراست میں لیا گیا ہے۔انہیں منشیات استعمال کرنے کے جرم میں گرفتار کیا جاسکتا ہے۔کروز پر ڈرگس پارٹی سے حراست میں لئے گئے لوگوں سے تفتیش کے دوران ایک ڈرگس پیڈلر کا نام سامنے آیا ہے۔این سی بی کی ایک ٹیم اس کی تلاش میں سرگرم ہے۔این سی بی کے 22 افسر پیسنجر بن کر کروز میں سوار ہوئے تھے۔کہا جارہا ہے کہ 1800 لوگوں سے 8 لوگوں کو حراست میں لیا گیا ہے تو ظاہر ہے کہ ان کے پاس سے کچھ برآمد ہوا ہوگا۔این سی بی کی کارروائی ابھی جاری ہے تمام لوگوں سے تفتیش کی جارہی ہے۔

این سی بی ذرائع کے مطابق کسی کی بھی گرفتاری سے قبل ان کا بیان درج کرنا ضروری ہے۔تمام 8 لوگوں کا این ڈی پی سی ایکٹ کے تحت بیان درج کیا جارہا ہے۔بیان درج کرنے کے بعد انہیں گرفتار کیا جاسکتا ہے۔فی الحال شاہ رخ خان کے بیٹے آرین کو گرفتار کرلیا گیا ہے۔