مالیگاؤں سمیت نو بلدیاتی ادارو‌‌ں میں میئر کا عہدہ خواتین (اوپن کیٹیگری) کے لیے مختص

میئر کا انتخاب 28 یا 29 جنوری کے آس پاس متوقع

ممبئی: ریاست مہاراشٹر کے نو بڑے بلدیاتی اداروں میں میئر کا عہدہ خواتین کے لیے مخصوص (ریزرو) قرار دیا گیا ہے۔ اوپن کیٹیگری میں آنے والے بڑے شہری اداروں میں ممبئی، پونے، پمپر ی چنچوڑ (پی سی ایم سی) اور ناگپور شامل ہیں۔

ممبئی کے علاوہ پمپر ی چنچوڑ (پی سی ایم سی)، پونے، بھیونڈی اور دھولیہ میں بھی اوپن کیٹیگری سے خواتین میئر ہوں گی۔ اسی طرح نوی ممبئی، مالیگاؤں، ناندیڑ اور میرا بھائیندر میں بھی میئر کا عہدہ خواتین کے لیے اوپن کیٹیگری کے تحت مخصوص کیا گیا ہے۔

قرعہ اندازی کے عمل کی صدارت کرنے والی وزیر مملکت برائے شہری ترقیات مادھوری میسل نے ریزرویشن کے قرعہ اندازی کے عمل پر دھاندلی کے الزامات کے جواب میں کہا کہ حکومت نے اعتراضات کا نوٹس لیا ہے، تاہم انہوں نے شیوسینا (ادھو بالا صاحب ٹھاکرے گروپ) کے الزامات کو بے بنیاد قرار دیا۔

مادھوری میسل نے کہا کہ متعلقہ پارٹی اپنی سہولت کے مطابق ریزرویشن چاہتی تھی، جبکہ حکومت نے مکمل طور پر قوانین کے مطابق عمل کیا ہے۔

قانون کے مطابق میئر کے عہدے پر درج فہرست ذات (ایس سی)، درج فہرست قبائل (ایس ٹی)، دیگر پسماندہ طبقات (او بی سی) اور خواتین کے لیے باری باری ریزرویشن لازمی ہے۔ جیسا کہ پہلے بھی رپورٹ کیا جا چکا ہے، میئر کے انتخاب کا قانونی عمل اسی قرعہ اندازی کے بعد ہی شروع ہوتا ہے۔

ریزرویشن کے اعلان کے بعد بریہن ممبئی میونسپل کارپوریشن (بی ایم سی) کی خصوصی میٹنگ طلب کی جاتی ہے، جس میں میئر کے انتخاب کے شیڈول کی اطلاع دی جاتی ہے۔ عام طور پر نوٹیفکیشن کے بعد سات دن کی مہلت دی جاتی ہے، جس کے مطابق اس بار میئر کا انتخاب 28 یا 29 جنوری کے آس پاس متوقع ہے۔