جئے کھیڑا، سٹانہ اور کیمپ پولس کی مشترکہ کارروائی، ناکہ بندی توڑ کر فرار ہونے والی گاڑی سے دو گائے سمیت چھ مویشی برآمد
مالیگاؤں: آدھی رات کے وقت ایک مشتبہ گاڑی کے تعاقب کا سنسنی خیز معاملہ سامنے آیا، جس میں جئے کھیڑا، سٹانہ اور مالیگاؤں کیمپ پولس اسٹیشن کی ٹیموں نے مشترکہ کارروائی کرتے ہوئے ایک شخص کو گرفتار کرلیا، جبکہ دو ملزمان پولس کو چکمہ دے کر فرار ہونے میں کامیاب ہوگئے۔ پولیس نے گاڑی کو ضبط کرتے ہوئے اس میں موجود دو گائے سمیت چار مویشیوں کو برآمد کیا ہے۔پولس سے موصولہ اطلاع کے مطابق رات کے وقت مشتبہ گاڑی کی نقل و حرکت کی اطلاع ملنے کے بعد پولیس نے فوری طور پر ناکہ بندی شروع کی۔ جئے کھیڑا پولیس اسٹیشن کی حدود میں گاڑی کو روکنے کی کوشش کی گئی، تاہم ڈرائیور نے ناکہ بندی توڑ دی اور گاڑی سٹانہ کی سمت لے گیا۔
سٹانہ پولس نے بھی گاڑی کو روکنے کے لیے ناکہ بندی کی، لیکن مشتبہ گاڑی نے وہاں بھی پولس کو چکمہ دیتے ہوئے ناکہ بندی توڑ دی اور مالیگاؤں کی جانب فرار ہونے کی کوشش کی۔ اس کے بعد کیمپ پولیس اسٹیشن کی ٹیم نے بھی ناکہ بندی کرتے ہوئے گاڑی کو روکنے کی کوشش کی، جس کے نتیجے میں تینوں پولیس اسٹیشنوں کی ٹیمیں گاڑی کے تعاقب میں سرگرم ہوگئیں۔کافی دیر تک جاری رہنے والے اس تعاقب کے بعد پولیس ٹیموں نے بالآخر گاڑی کو مالیگاؤں کیمپ پولیس اسٹیشن کی حدود میں قابو کرلیا۔ گاڑی کی تلاشی لینے پر اس میں دو گائے سمیت چار بیل یعنی کل چھ مویشی پائے گئے، جنہیں پولس نے اپنی تحویل میں لے لیا۔
پولس کارروائی کے دوران گاڑی میں موجود افراد میں سے ایک شخص کو گرفتار کرلیا گیا، جبکہ دو دیگر افراد موقع سے فرار ہوگئے۔ گرفتار شخص کی شناخت شیخ شریف شیخ شیخ یونس کے طور پر بتائی گئی ہے۔پولس کے مطابق فرار ملزمان میں محسن سیلانی، ساکن مالیگاؤں اور معین شیخ، ساکن قصاب باڑہ شامل ہیں، جبکہ تیسرے شخص کے طور پر شعیب خان، ساکن مالیگاؤں کا نام بھی بتایا گیا ہے۔پولس کی جانب سے فرار ملزمان کی تلاش جاری ہے۔
اس معاملے میں جئے کھیڑا پولیس اسٹیشن میں بی این ایس کی دفعات 109، 281، 309 اور 324، اینمل ایکٹ 1960 کی دفعات 5 اور 9 اور موٹر وہیکل ایکٹ کی دفعہ 184 کے تحت مقدمہ درج کیے جانے کی اطلاع ہے۔پولس نے ضبط شدہ گاڑی اور برآمد مویشیوں کو تحویل میں لے کر مزید تفتیش شروع کردی ہے۔پولس اس بات کی بھی جانچ کر رہی ہے کہ مویشی کہاں سے لائے گئے تھے اور انہیں کہاں لے جایا جارہا تھا۔ معاملے میں فرار ملزمان کی گرفتاری کے لیے مزید کارروائی جاری ہے۔
