ممبئی کے ناگپاڑہ میں دو گروہ کے درمیان پرتشدد جھڑپ

 پانچ افراد زخمی، ایک کی حالت نازک، 13 حراست میں، ویڈیو وائرل

ممبئی: جنوبی ممبئی کے گنجان آباد علاقے ناگپاڑہ میں جمعرات کی رات دو مقامی گروپوں کے درمیان شدید پرتشدد جھڑپ پیش آئی، جس کے نتیجے میں کم از کم پانچ افراد شدید زخمی ہو گئے، جن میں ایک کی حالت نازک بتائی جا رہی ہے۔ واقعے کے بعد علاقے میں خوف و ہراس پھیل گیا جبکہ پولیس نے فوری کارروائی کرتے ہوئے 13 افراد کو حراست میں لے لیا ہے۔

ممبئی پولیس کے مطابق، یہ جھگڑا مبینہ طور پر مالی لین دین کے تنازع سے شروع ہوا، جو پہلے تلخ کلامی اور بعد ازاں شدید مارپیٹ میں تبدیل ہو گیا۔ دیکھتے ہی دیکھتے معاملہ اس قدر بگڑ گیا کہ دونوں طرف سے لاٹھیاں اور لوہے کی سلاخیں استعمال کی گئیں۔

واقعے کی ویڈیو سوشل میڈیا پر تیزی سے وائرل ہو رہی ہے، جس میں سڑک پر دو افراد کو بے ہوشی کی حالت میں پڑا دیکھا جا سکتا ہے، جبکہ دیگر افراد کھلے عام لاٹھیوں اور راڈز کے ساتھ ایک دوسرے پر حملہ کرتے نظر آ رہے ہیں۔

تشدد میں زخمی ہونے والے پانچ سے چھ افراد کو فوری طور پر قریبی اسپتال منتقل کیا گیا۔ اسپتال انتظامیہ کے مطابق، بیشتر زخمیوں کی حالت مستحکم ہے، تاہم ایک شخص آئی سی یو میں زیرِ علاج ہے اور اس کی حالت تشویشناک بتائی جا رہی ہے۔

پولیس نے علاقے میں اضافی نفری تعینات کر دی ہے اور واقعے کی مکمل جانچ کی جا رہی ہے۔ حکام کا کہنا ہے کہ وائرل ویڈیو کی بنیاد پر مزید افراد کی شناخت کی جا رہی ہے اور قصورواروں کے خلاف سخت قانونی کارروائی کی جائے گی۔