مہاراشٹر کے وزیراعلی ادھو ٹھاکرے کے خلاف متنازعہ بیان بازی معاملے میں گرفتار کئے گئے مرکزی وزیر نارائن رانے کو عدالت نے ضمانت دے دی۔رتناگری
سے انہیں دوپہر میں گرفتار کیا گیا تھا۔گرفتاری کے بعد انہیں ضلع رائے گڑھ کی مہاڈ سول کورٹ میں پیش کیا گیا تھا۔پولیس نے عدالت سے نارائن رانے کی سات دن کی تحویل کی درخواست کی تھی۔حالانکہ دونوں فریقین کی دلائل سننے کے بعد عدالت نے رانے کو ضمانت دے دی۔شنوائی کے دوران نارائن رانے کی بیوی نیلم رانے بھی عدالت میں موجود تھیں۔اس سے قبل رانے کو گرفتار کرنے کے بعد انہیں کچھ وقت سنگمیشور پولیس اسٹیشن میں رکھا گیا بعد ازاں انہیں مہاڈ پولیس اسٹیشن منتقل کردیا گیا۔
یہ بھی پڑھیں: ۔۔۔ادھو ٹھاکرے کو طمانچہ رسید کرنے کا متنازعہ بیان دینے پر نارائن رانے گرفتار
واضح رہے کہ مہاڈ میں ان کے خلاف مقدمہ درج ہوا ہے۔گرفتاری سے بچنے کیلئے رانے کے رتناگری کی عدالت میں عبوری ضمانت کی درخواست داخل کی تھی جسے عدالت نے مسترد کردیا تھا۔واضح رہے کہ نارائن رانے نے جب سے مہاراشٹر میں جن آشیرواد یاترا کا آغاز کیا ہے، تب سے ان پر 49 ایف آئی آر درج ہوچکی ہے۔حالانکہ ان میں سے زیادہ تر معاملات کووڈ اصولوں کی خلاف ورزی پر درج ہوئے ہیں۔رانے کے خلاف تھانے نوپاڑہ پولیس اسٹیشن میں دفعہ 500، 505(2)، 153-B(1)(c) کے تحت ایک مقدمہ درج کیا گیا ہے۔اس سے قبل ان پر پونے، ناسک اور رائے گڑھ میں ایف آئی آر درج ہوچکی تھی۔شیوسینا نے منگل کے روز ریاست کے 17 مقامات پر رانے کے خلاف زبردست احتجاج کیا۔ناسک میں بی جے پی دفتر پر پتھر بازی کی گئی تو وہیں ممبئی میں رانے کی رہائش پر مظاہرہ کرنے والوں پر پولیس نے لاٹھی چارج کیا۔
