نڈا کے بیان نے بی جے پی کے چہرے سے نقاب اتار دیا، بی جے پی آمریت کی طرف بڑھ رہی ہے: ادھو ٹھاکرے

بی جے پی علاقائی جماعتوں کو ختم کرنے کی سازش کررہی ہے، مخالفین کی آواز دبانے کیلئے طاقت کا استعمال کیا جارہا ہے، لیکن وقت ہمیشہ ایک سا نہیں رہتا، بی جے پی اور نڈا کو سوچنا چاہیے کہ جب وقت بدلے گا تب ان کا کیا ہوگا؟ :ٹھاکرے

مہاراشٹر کے گورنر بی ایس کوشیاری کے حالیہ متنازعہ بیان کے بعد پٹنہ میں بی جے پی کی ایک پارٹی میٹنگ میں پارٹی کے قومی صدر جے پی نڈا کا یہ بیان کہ ملک میں صرف بی جے پی باقی رہے گی جبکہ تمام سیاسی پارٹیاں ختم ہوجائیں گی، نے ایک بڑا تنازعہ کھڑا کر دیا ہے. شیوسینا سربراہ ادھو ٹھاکرے نے جے پی نڈا پر تنقید کرتے ہوئے کہا کہ یہ بیان بی جے پی کے اصل چہرے اور آمریت کی طرف اس کی پیش قدمی کو ظاہر کرتا ہے. ٹھاکرے نے بی جے پی لیڈران پر علاقائی سیاسی جماعتوں کو ختم کرنے کی سازش کا الزام عائد کیا.

یہ بھی پڑھیں:...... ملک سے تمام پارٹیاں ختم ہوجائیں گی، رہے گی تو صرف بی جے پی: جے پی نڈا

دوسری طرف ٹھاکرے نے منی لانڈرنگ کیس میں انفورسمنٹ ڈائریکٹوریٹ (ای ڈی) کے ذریعہ شیوسینا رکن پارلیمان سنجے راؤت کی گرفتاری پر بی جے پی کو تنقید کا نشانہ بنایا اور راجیہ سبھا رکن پارلیمنٹ کو ایک سچے شیوسینک کے طور پر سراہا جو دباؤ کے سامنے نہیں جھکے۔

ایکناتھ شندے کی بغاوت کے بعد پارٹی کی بقا کی جنگ لڑرہے ادھو ٹھاکرے نے جے پی نڈا کو شیوسینا کو ختم کرنے کا چیلنج دیا. ٹھاکرے نے کہا کہ نڈا کا کہنا ہے کہ مہاراشٹر میں شیوسینا ختم ہونے کے دہانے پر ہے. نڈا کا دعویٰ ہے کہ این سی پی ایک خاندان کی پارٹی ہے. کانگریس بھائی اور بہن کی پارٹی ہے اور بی جے پی خاندانی سیاست اور حکمرانی کے خلاف لڑنا چاہتی ہے. لیکن اہم سوال یہ ہے کہ اصل میں بی جے پی کنبہ کی حقیقت کیا ہے جو کانگریس، این سی اور دیگر سیاسی جماعتوں کے لیڈران بی جے پی میں شامل ہورہے ہیں.

ادھو ٹھاکرے نے کہا کہ بی جے پی علاقائی سیاسی جماعتوں کو ختم کرنے کی سازش کررہی ہے. نقاب اتر چکا ہے, میں نے گورنر بھگت سنگھ کوشیاری کا شکریہ ادا کیا تھا انہوں نے نادانستہ طور پر مراٹھی عوام کو کچلنے کا خواب ہمارے سامنے لایا. بی جے پی کے قومی صدر نے بھی انکشاف کیا کہ وہ نہیں چاہتے کہ ملک میں دوسری پارٹیاں موجود ہوں، وہ آمریت چاہتے ہیں. تاہم ادھو نے بی جے پی کو شیوسینا پارٹی کو ختم کرنے کا چیلنج دیا. نڈا کے بیان کو خطرناک اور سنگین قرار دیتے ہوئے ٹھاکرے نے کہا کہ ان کے تبصرے ملک کو آمریت کی طرف لے جانے کی جانب اشارہ کرتے ہیں. آج کی سیاست پریشان کن ہے. انہوں نے کہا کہ آج جس طرح سے بی جے پی اپنے بازو پھیلا رہی ہے وہ صرف طاقت کا استعمال کررہی ہے دماغ کا نہیں. ٹھاکرے نے خبردار کیا کہ اگر آپ دوسروں کو ختم کرنے کیلئے طاقت کا استعمال کررہے ہیں تو وقت ہمیشہ ایک جیسا نہیں رہتا بدل جاتا ہے. بی جے پی اور نڈا کو سوچنا چاہیے کہ جب وقت بدلے گا تو ان کا کیا ہوگا.

ٹھاکرے نے سنجے راؤت کی تعریف کرتے ہوئے کہا کہ وہ کسی دباؤ میں نہیں آئے. سنجے راؤت ایک کٹر شیوسینک ہیں، مجھے سنجے راؤت پر فخر ہے جو میرے بہترین دوست ہیں. ٹھاکرے نے انتقامی سیاست کھیل کر مخالفین کی آواز کو دبانے پر بی جے پی کو تنقید کا نشانہ بنایا اور پوچھا کہ اگر مرکزی تحقیقاتی ایجنسیوں کو مخالفین کے خلاف تعینات کیا جاتا ہے تو جمہوریت کہاں ہے؟ سنجے راؤت جہاز سے کود سکتے تھے لیکن انہوں نے صاف کہہ دیا کہ وہ مر جائیں گے لیکن ایسا نہیں کریں گے،ہتھیار نہیں ڈالیں گے. باغیوں پر تنقید کرتے ہوئے ٹھاکرے نے کہا کہ جن لوگوں نے راستہ بدلا ہے وہ حمام میں نہانے گئے ہیں، جب تک ان کے جسم پر اقتدار کا جھاگ ہوگا وہ ہم پر تنقید کرسکتے، لیکن انہیں مستقبل میں حالات کا احساس ہوگا.