آئی پی ایل میچ کے دوران ریان پراگ کا ویپنگ کرتے ہوئے ویڈیو وائرل

بی سی سی آئی کی جانب سے نرمی برتنے کا امکان نہیں, ہوسکتی ہے کارروائی

نئی دہلی: آئی پی ایل میں پنجاب کنگز اور راجستھان رائلز کے میچ کے دوران راجستھان رائلز کے کپتان ریان پراگ لائیو براڈکاسٹ کے دوران ڈریسنگ روم میں ویپنگ (ای-سگریٹ استعمال) کرتے نظر آئے، جس کی ویڈیو سوشل میڈیا پر تیزی سے وائرل ہو رہی ہے۔

یہ واقعہ اس وقت پیش آیا جب راجستھان رائلز ہدف کا تعاقب کر رہی تھی۔ اطلاعات کے مطابق 16ویں اوور کے دوران ریان پراگ اپنے ساتھی کھلاڑیوں دھرو جوریل اور یشسوی جیسوال کے ساتھ موجود تھے اور اسی دوران وہ مبینہ طور پر ویپنگ کرتے دکھائی دیے۔

قانونی طور پر اس معاملے نے سنگین سوالات کھڑے کر دیے ہیں کیونکہ اسٹیڈیم اور ڈریسنگ روم میں سگریٹ نوشی ممنوع ہے، سوائے مخصوص مقامات کے۔ مزید یہ کہ بھارت میں ای-سگریٹ/ویپ پر Prohibition of Electronic Cigarettes Act (PECA) 2019 کے تحت پابندی عائد ہے، جس کے تحت اس کی تیاری، خرید و فروخت، درآمد، برآمد اور تشہیر سب غیر قانونی ہیں۔

ماہرین کے مطابق ویپنگ صحت کے لیے خطرناک ہو سکتی ہے کیونکہ اس میں شامل اجزاء کے بارے میں واضح معلومات نہیں ہوتیں، خاص طور پر ایک پیشہ ور کھلاڑی کے لیے یہ زیادہ تشویش ناک ہے۔

یہ معاملہ اب مزید تحقیقات کا متقاضی ہے اور دیکھنا ہوگا کہ اس پر متعلقہ حکام کیا کارروائی کرتے ہیں۔ 'فرنچائز اور کپتان کو اپنی وجوہات تیار رکھنی ہوں گی کیونکہ اس طرح کے واقعے پر BCCI کی جانب سے نرمی برتنے کا امکان نہیں ہے۔'

​یہ پہلی بار نہیں ہے کہ اس سیزن میں RR (راجستھان رائلز) کسی تنازع میں گھری ہو۔ اس سے قبل، ان کے مینیجر نے ڈگ آؤٹ میں موبائل فون کا استعمال کر کے PMOA پروٹوکول کی خلاف ورزی کی تھی۔ وہ منظر بھی براہ راست نشریات کے دوران کیمرے میں قید ہو گیا تھا اور مکمل چھان بین کے بعد BCCI نے منیجر کو تنبیہ کی تھی اور جرمانہ بھی عائد کیا تھا۔"