کل شام پانچ بجے فلور ٹیسٹ، ادھو حکومت کو گورنر کوشیاری کی ہدایت

شیوسینا پہنچی سپریم کورٹ، معاملے کی سماعت کی درخواست منظور، آج شام 5 بجے سماعت، شندے گروہ کی کل ممبئی آمد متوقع

 گورنر بھگت سنگھ کوشیاری نے وزیر اعلیٰ ادھو ٹھاکرے کو فلور ٹیسٹ کی ہدایت دی ہے۔ کل بروز جمعرات کو شام 5 بجے فلور ٹیسٹ ہوگا۔ یہ خبر آتے ہی سیاسی ہلچل مچ گئی۔ سب سے پہلے شندے نے اپنے گروہ کے ساتھ آج گوہاٹی سے نکلنے کا اعلان کیا وہ پہلے گوا جائیں۔ ہوٹل تاج کنونشن میں 71 کمرے بک کرائے گئے ہیں۔ کل یہ لوگ ممبئی کے لیے روانہ ہوں گے۔ یہاں شیوسینا آج سپریم کورٹ پہنچی اور عدالت نے بھی درخواست قبول کر لی۔ سماعت آج شام 5 بجے ہوگی۔ اس سے پہلے بی جے پی آج شام اپنے اراکین اسمبلی کے ساتھ میٹنگ کرے گی تاکہ وہ کل کے طے شدہ فلور ٹیسٹ کی تیاری کر سکے۔
سنجے راؤت نے کہا کہ 12 اراکین اسمبلی کی معطلی کا معاملہ عدالت میں چل رہا ہے اور ایسے میں گورنر اجلاس بلا رہے ہیں، جو غلط ہے۔ وہ اس موقع کی تلاش میں تھے۔ اس فیصلے کے لیے گورنر بھی کہیں نہ کہیں سے دباؤ میں رہے ہوں گے۔  پردے کے پیچھے کون کھیل رہا ہے سب دیکھ رہے ہیں۔
ذرائع کے مطابق شندے گروہ اور بی جے پی کے درمیان حکومت سازی کے لیے سانٹھ گانٹھ جاری ہے۔ بی جے پی نے شندے گروپ کو 8 کابینی اور 5 ریاستی وزارت کی پیشکش کی ہے۔  ذرائع کے مطابق نائب وزیر اعلیٰ کے لیے ایکناتھ شندے کا نام لیا گیا ہے۔  گلاب راؤ پاٹل، سمبھوراج دیسائی، سنجے شیرساٹ، دیپک کیسرکر، ادے سمنت کو وزیر بنایا جا سکتا ہے۔