نواب ملک کا ہائیڈروجن بم

فڑنویس پر اپنے دورِ اقتدار میں جعلی نوٹ ریکیٹ چلانے والوں کو تحفظ فراہم کئے جانے کا الزام

ممبئی میں کروز ڈرگس معاملہ میں نواب ملک سمیر وانکھیڈے کو مسلسل نشانہ بنا رہے ہیں۔آج پریس کانفرنس کے دوران سابق وزیراعلی دیویندر فڑنویس ان کے نشانے پر تھے۔ ملک نے کہا کہ فڑنویس کی حکومت میں جعلی نوٹ ریکیٹ چلانے والوں کو تحفظ فراہم کیا گیا تھا۔ان لوگوں کے تار داؤد سے بھی جڑے ہوئے تھے۔

ملک کے اس الزام پر فڑنویس نے ردعمل ظاہر کرتے ہوئے ٹوئیٹر پر برنارڈ شا کا قول نقل کیا اور کہا کہ کیچڑ میں پتھر نہیں پھینکنا چاہیے۔بی جے پی کے سینئرلیڈر اشیش شیلار نے نواب ملک کے الزامات کا جواب دیتے ہوئے ایک پریس کانفرنس میں کہا کہ ہائیڈروجن بم پھوڑنے کی بات کرکے نواب ملک نے مرچی پٹاخے سے پانے ہاتھ جلا لئے ہیں۔

 یہ بھی پڑھیں:۔۔۔سمیر وانکھیڈے کے اہل خانہ کی گورنر بھگت سنگھ کوشیاری سے ملاقات_0483452012.html

نواب ملک کے تمام الزامات کا تعلق دیویندر فڑنویس سے اس طرح کا ہے جیسے اکبر بیربل کی کہانی میں بیربل نے نیچے آگ رکھ کر اوپر کھچڑی پکائی تھی۔ نواب ملک کا الزام تھا کہ پارٹی میں غنڈوں کو جگہ دی، انہیں اعلی عہدے دیئے گئے۔ انہوں نے کہا کہ ہاں یہ سچ ہے کہ منّا یادو، حاجی حیدو اور حاجی عرفات پارٹی کے اراکین ہیں۔ انہیں عہدہ دیا گیا لیکن ان پر ایک بھی الزام نہیں ہے اس بات کا یقین کرنے کے بعد انہیں عہدہ دیا گیا تھا۔ جعلی نوٹ معاملہ آئی ایس آئی، پاکستان اور بنگلہ دیش سے جڑا ہوا تھا۔ممبئی سے عمران عالم شیخ اور پونے سے ریاض شیخ کے علاوہ نئی ممبئی سے بھی ایک گرفتاری ہوئی تھی۔لیکن 14 کروڑ 56 لاکھ کی ضبطی کو 8 کروڑ 80 لاکھ بتا کر معاملہ دبا دیا گیا۔ملک نے کہا کہ ہم جس افسر پر الزامات لگا رہے ہیں اسے بچانے کی کوشش ہورہی ہے کیونکہ فڑنویس جی کے اس افسر سے پرانے تعلقات ہیں۔ 2008 میں کوئی افسر ملازمت پر آتا ہے، اور 14 سال سے ممبئی چھوڑتا ہی نہیں اس کے پیچھے کیا راز ہے؟

جعلی نوٹ معاملہ کے ملزم عمران عالم شیخ کو 6 ماہ بعد مائناریٹی کمیشن کا چیئرمن بنایا گیا۔ملک سوال کیا کہ فڑنویس جی آپ دوسروں پر انڈرورلڈ سے تعلق ہونے کے الزامات لگا رہے ہو، ہم آپ سے پوچھنا چاہتے ہیں کہ سارے انڈرورلڈ کے لوگ، جو انڈرورلڈ کے رابطہ میں ہیں، مجرمین و ملزمین ہیں، آپ نے وزیراعلی رہتے ہوئے ان تمام لوگوں کو سرکاری بورڈ اور سرکاری کمیشن کا صدر کیوں بنایا؟ 

اس سے قبل فڑنویس نے منگل کے روز کچھ کاغذات دکھاتے ہوئے دعوی کیا تھا کہ 16 سال قبل ملک نے ایل بی ایس روڈ پر داؤد کے غنڈوں سے ساڑھے تین کروڑ کی زمین 20 لاکھ روپے میں خریدی تھی۔فڑنویس نے کہا کہ کرلا میں تین ایکڑ زمین کی ایک رجسٹری سیلِڈس کمپنی کے نام پر ہوئی جو نواب ملک کے خاندان کی ہے۔ یہ زمین 1993 بم بلاسٹ کیس میں عمر قید کی سزا پانے والے سردار ولی خان اور داؤد ابراہیم کی بہن حسینہ پارکر کے قریبی سلیم پٹیل سے خریدی گئی۔ رجسٹری پر نواب ملک کے بیٹے فراز ملک نے دستخط کئے ہیں۔

فڑنویس نے کہا کہ تفتیشی ایجنسی کو کاغذات مہیا کرائے جائیں گے اور اس کی ایک کاپی این سی پی سربراہ شرد پوار کو بھیجیں گے۔فڑنویس کے الزامات کو بے بنیاد بتاتے ہوئے ملک نے کہا جس زمین کا ذکر ہورہا ہے وہاں ان کا خاندان پہلے سے کرایہ دار تھا بعد میں اس کا مالکانہ حق لیا گیا۔ زمین بنیادی طور پر منیرا پٹیل کی ملکیت ہے  اس نے اپنی زمین کی پاور آف اٹارنی سلیم پٹیل کو دی تھی۔