جگدیپ دھنکھر نائب صدر جمہوریہ منتخب

اپوزیشن کی مشترکہ امیدوار ماگریٹ الوا کو شکست، وزیراعظم نریندر مودی، راہل گاندھی، شرد پوار سمیت دیگر لیڈران نے مبارکباد پیش کی

این ڈی اے امیدوار جگدیپ دھنکھر اپوزیشن کی مشترکہ امیدوار ماگریٹ الوا کو شکست دے کر ملک کے 14 ویں نائب صدر جمہوریہ منتخب ہوئے. مغربی بنگال کے سابق گورنر دھنکھر نے 528 ووٹ حاصل کیے جبکہ الوا کو 182 ووٹ ملے۔

تقریباً 725 ایم پیز نے رائے شماری میں حصہ لیا، جو کہ کل ووٹوں کا 92.94 فیصد ہے. صدر دروپدی مرمو، کانگریس لیڈر راہل گاندھی، نیشنلسٹ کانگریس پارٹی (این سی پی) سربراہ شرد پوار، مرکزی داخلہ امت شاہ، مرکزی وزیر دفاع راج ناتھ سنگھ اور دیگر لوگوں نے جیت کے بعد دھنکھر کو مبارکباد پیش کی۔

صدر مرمو نے ٹوئیٹ کے ذریعے جگدیپ دھنکھر کو ہندوستان کا نائب صدر منتخب ہونے پر مبارکباد پیش کرتے ہوئے کہا کہ قوم آپ کی عوامی زندگی کے طویل اور بھرپور تجربے سے مستفید ہوگی۔ راہل گاندھی نے ٹوئیٹ کر کے کہا کہ جگدیپ دھنکھر جی کو ہندوستان کا 14 واں نائب صدر منتخب ہونے پر مبارک باد. راہل نے اپوزیشن کی نمائندگی کرنے والی امیدوار ماگریٹ الوا کا بھی شکریہ ادا کیا. این سی پی سربراہ شرد پوار نے ٹوئیٹ میں کہا کہ جگدیپ دھنکھر کو ہندوستان کا نائب صدر منتخب ہونے پر مبارکباد۔  نائب صدر کے طور پر آپ کے دور میں کامیابی کی خواہش کرتا ہوں. راجناتھ سنگھ نے بھی ٹوئیٹ کرکے جگدیپ دھنکھر کو نائب صدر کے انتخابات جیتنے پر مبارکباد پیش کرتے ہوئے کہا کہ ان کی طویل عوامی زندگی، وسیع تجربہ اور لوگوں کے مسائل کی گہری سمجھ سے یقیناً قوم کو فائدہ پہنچے گا۔ دریں اثنا، وزیر اعظم نریندر مودی نے انتخاب کے فوراً بعد جگدیپ دھنکھر سے دہلی میں ان کی رہائش گاہ پر ملاقات کی اور انہیں مبارکباد پیش کی۔