مہاراشٹر: سینئر وزراء کا لاک ڈاؤن میں توسیع کا مطالبہ

 

بھجبل، ویڈیٹی وار اور ادئے سامنت لاک ڈاؤن میں توسیع کے حق میں، آج وزیراعلی کی سرپرستی میں کابینہ کی میٹنگ میں اہم فیصلے ہونے کی توقع

ممبئی: ریاست میں کرونا کے نئے معاملات میں اضافہ کے بعد بریک دی چین مہم کے تحت لاک ڈاؤن میں توسیع کا مطالبہ کیا جارہا ہے۔مہاراشٹر کے سینئر وزراء چھگن بھجبل، وجئے ویڈیٹی وار اور ادئے سامنت نے منگل کے روز لاک ڈاؤن میں توسیع کا پرزور مطالبہ کیا ہے کیونکہ ان کا ماننا ہے کہ حالیہ لاک ڈاؤن کے دوران کچھ مثبت نتائج برآمد ہوئے ہیں، کرونا کے معاملات میں کمی کے ساتھ ساتھ شرح اموات میں بھی کمی واقع ہوئی ہے۔اس سلسلے میں آج وزیراعلی ادھو ٹھاکرے کی سرپرستی میں ریاستی کابینہ کی میٹنگ کا انعقاد متوقع ہے جس میں حالات کا جائزہ لینے کے بعد یکم مئی سے لاک ڈاؤن میں توسیع کا فیصلہ لیا جائے گا۔واضح رہے کہ اس میٹنگ میں ریاست بھر کے 18 سے 44 سال عمر کے لوگوں کو مفت ویکسن مہیا کرانے سے متعلق فیصلہ لیا جائے گا۔اطلاعات کے مطابق یکم مئی سے شروع ہونے والی مفت ویکسینیشن مہم کیلئے حکومت کو 7 ہزار 500 کروڑ روپئے درکار ہیں۔لاک ڈاؤن میں توسیع کا مطالبہ کرنے والے وزراء کے مطابق یوم مہاراشٹر یعنی یکم مئی سے شروع ہونے والی مفت ویکسینیشن مہم کرونا معاملات کی روک تھام میں کارآمد ثابت نہیں ہونے کے امکانات ہیں کیونکہ مرکزی حکومت نے متنبیہ کیا تھا کہ مئی میں کرونا شباب پر ہوگا۔فی الحال ریاست میں 6 لاکھ 72 ہزار 434 کرونا مثبت معاملات ہیں، ریاستی محکمہ صحت کا اندازہ ہے کہ 2 مئی تک مثبت معاملات کی تعداد 11 لاکھ ہوجانے کا امکان ہے۔بھجبل، ویڈیٹی وار اور سامنت نے علیحدہ علیحدہ بیان میں کہا کہ بھیڑ بھاڑ سے بچنے، وائرس کے پھیلاؤ کو روکنے اور بریک دی چین کے مثبت نتائج حاصل کرنے کیلئے لاک ڈاؤن میں توسیع کرنی چاہیے۔ویڈیٹی وار نے صلاح دی کہ لاک ڈاؤن میں توسیع اشد ضروری ہے، خاص طور پر ودربھ اور مراٹھواڑہ میں لاک ڈاؤن میں توسیع ناگزیر ہے۔