ڈی وائے ایس پی سدھارتھ باروال کی قیادت میں منشیات، اسلحہ، جوئے،گٹکھے،غیر قانونی ذبیحہ اور جرائم کے خلاف سخت کارروائیاں
مالیگاؤں : مالیگاؤں شہر کے ڈی وائے ایس پی سدھارتھ باروال کی قیادت میں گزشتہ ایک سال (8 اگست 2025 تا 8 اگست 2026) کے دوران غیر قانونی سرگرمیوں کے خلاف سخت اور فیصلہ کن مہم چلائی گئی۔ اس عرصے میں پولس نے مجموعی طور پر 477 چھاپے مارے، 710 ملزمان کو گرفتار کیا اور 3 کروڑ 9 لاکھ 55 ہزار 42 روپے مالیت کا غیر قانونی سامان ضبط کرکے جرائم پیشہ عناصر پر لگام لگانے کی کوشش کی۔
منشیات فروشوں کے خلاف سخت کارروائی۔۔۔۔۔۔۔۔۔۔
این ڈی پی ایس ایکٹ کے تحت 32 کارروائیوں میں 63 ملزمان گرفتار کیے گئے۔ پولیس نے 183 بوتلیں کوڈین فاسفیٹ، 19 ہزار 761 الپرازولم گولیاں، 244.82 گرام ایم ڈی پاؤڈر، 7 ہزار 420 کلو گانجا کے علاوہ 13 موبائل فون، ایک کار، دو اسکوٹر اور چھ موٹر سائیکلیں ضبط کیں۔
اسلحہ مافیا کے خلاف کارروائی۔۔۔۔۔۔۔۔
آرمز ایکٹ کے تحت 54 چھاپوں میں 80 ملزمان گرفتار کیے گئے۔اس کارروائی کے دوران 19 دیسی پستول، 20 کارتوس، تین تلواریں، آٹھ چاقو، پانچ چاپرز، ایک گوپتی، ایک چھرا اور دو موٹر سائیکلیں ضبط کی گئیں، جن کی مجموعی مالیت 5 لاکھ 80 ہزار 700 روپے ہے۔
غیر قانونی ذبیحہ اور مویشی نقل و حمل پر شکنجہ............
اینیمل ایکٹ کے تحت 131 کارروائیوں میں 177 افراد گرفتار کیے گئے۔ پولس نے 310 زندہ مویشی، 11 ہزار 900 کلو گوشت، آٹھ پک اپ، 12 آٹو، 13 رکشے اور دو کاریں ضبط کیں، جن کی مجموعی مالیت 1 کروڑ 96 لاکھ 14 ہزار 700 روپے ہے۔
جوئے اور گٹکھا مافیا بھی نشانے پر.........
جوئے کے خلاف 100 چھاپوں میں 274 ملزمان گرفتار کیے گئے اور 6 لاکھ 79 ہزار 329 روپے نقد کے ساتھ مٹکا جوئے کا سامان ضبط کیا گیا۔ گٹکھے کی غیر قانونی تجارت کے خلاف 34 کارروائیوں میں 44 افراد گرفتار ہوئے جبکہ 27 لاکھ 56 ہزار 769 روپے مالیت کا گٹکھا، ایک پک اپ، ایک رکشا، دو موٹر سائیکلیں اور تین کاریں ضبط کی گئیں۔
اشیائے ضروریہ اور غیر قانونی سرگرمی ..........
شراب کے خلاف بھی سختی........
پولس کی جانب سے ضروری اشیا ایکٹ کے تحت 32 کارروائیوں میں 45 ملزمان گرفتار کیے گئے اور 70 گیس سلنڈر، تین موٹرز، 29 وزن کے آلات، 18 مسافر رکشے اور دو بیٹریاں ضبط ہوئیں، جن کی مالیت 36 لاکھ 96 ہزار 550 روپے ہے۔ پابندی ایکٹ کے تحت 66 چھاپوں میں 66 افراد گرفتار کیے گئے اور 823 لیٹر دیسی شراب، 34 بوتلیں اور ایک موٹر سائیکل ضبط کی گئی۔ اسی طرح کاٹپا ایکٹ کے تحت 28 کارروائیوں میں 28 افراد گرفتار ہوئے اور سگریٹ، تمباکو اور پان مصالحہ برآمد کیا گیا۔
تہوار اور انتخابات مکمل پرامن.......
پولس کی مؤثر منصوبہ بندی کے باعث مالیگاؤں میں عید میلاد النبی ﷺ، گنیش اتسو، گھٹ استھاپنا، وجیا دشمی، شبِ برات، رمضان عید اور گڑھ یاترا سمیت تمام اہم مذہبی و سماجی تقریبات مکمل امن و امان کے ساتھ منعقد ہوئیں اور کسی بھی قسم کا ناخوشگوار واقعہ پیش نہیں آیا۔
اسی طرح 2026 کے میونسپل انتخابات کے دوران مالیگاؤں کے پولنگ اسٹیشنز پر ووٹنگ کا عمل بھی مکمل پرامن انداز میں انجام پایا اور قانون و نظم و ضبط کی کوئی شکایت سامنے نہیں آئی۔
منشیات مافیا کے خلاف مکوکا کی کارروائی.........
پوارڈی پولیس اسٹیشن کے جرم نمبر 50/2026 (این ڈی پی ایس) کے تحت شہر میں بڑھتی ہوئی منشیات کی تجارت پر قابو پانے کے لیے متعلقہ ملزمان کے خلاف مکوکا ایکٹ کے تحت کارروائی کا آغاز کیا گیا ہے اور اس سلسلے میں اعلیٰ حکام کو بھی تجویز ارسال کی گئی ہے۔ مزید برآں، 2025-26 کے دوران 14 خطرناک مجرموں کو ضلع ناسک سے جلاوطن کیا گیا۔
پولیس کا عزم........
مالیگاؤں شہر کے ڈی وائے ایس پی نے واضح کیا ہے کہ شہر میں امن و امان برقرار رکھنے اور جرائم پیشہ عناصر کے خلاف آئندہ بھی اسی شدت کے ساتھ کارروائیاں جاری رکھی جائیں گی تاکہ شہریوں کو محفوظ اور پرامن ماحول فراہم کیا جا سکے۔اس طرح کی تفصیلات ایک پریس ریلیز میں مالیگاؤں پولس انتظامیہ نے جاری کی ہے ۔
