مہاراشٹر میں ایس آئی آر مہم کی مدت میں توسیع، الیکشن کمیشن نے نیا شیڈول جاری کر دیا

17 اگست تک گھر گھر تصدیق جاری رہے گی، 27 اکتوبر کو حتمی ووٹر لسٹ شائع ہوگی

ممبئی: ریاست مہاراشٹر میں جاری خصوصی نظرِ ثانی (Special Intensive Revision – SIR) مہم کے سلسلے میں الیکشن کمیشن آف انڈیا نے اہم فیصلہ کرتے ہوئے مہم کی مدت میں توسیع کر دی ہے۔ اس فیصلے سے ایسے لاکھوں شہریوں کو سہولت ملے گی جن کے نام اب تک ووٹر لسٹ میں شامل نہیں ہو سکے یا جنہیں اپنے ووٹر ریکارڈ میں ضروری اصلاحات کرانی ہیں۔الیکشن کمیشن کی جانب سے جاری کردہ نظرِ ثانی شدہ شیڈول کے مطابق بوتھ لیول آفیسرز (BLO) اب 17 اگست 2026 تک گھر گھر جا کر ووٹروں کی تصدیق، اندراج اور معلومات کی جانچ کا کام انجام دیں گے تاکہ زیادہ سے زیادہ اہل شہریوں کو ووٹر فہرست میں شامل کیا جا سکے۔

کمیشن کے نئے پروگرام کے مطابق 17 اگست کو پولنگ مراکز کی ازسرِ نو تنظیم (Reorganization) کی جائے گی، جبکہ 24 اگست 2026 کو ابتدائی (مسودہ) ووٹر لسٹ شائع کی جائے گی۔ اس کے بعد 24 اگست سے 23 ستمبر 2026 تک شہری ووٹر لسٹ میں نام شامل کرانے، نام حذف کرانے، پتے یا دیگر تفصیلات میں ترمیم کے لیے اپنے دعوے اور اعتراضات داخل کر سکیں گے۔الیکشن کمیشن نے مزید بتایا کہ موصول ہونے والی تمام درخواستوں کی جانچ، سماعت اور فیصلہ 22 اکتوبر 2026 تک مکمل کر لیا جائے گا۔ تمام ضروری اصلاحات کے بعد 27 اکتوبر 2026 کو ریاست کی حتمی ووٹر لسٹ جاری کی جائے گی۔

کمیشن نے عوام سے اپیل کی ہے کہ وہ اس توسیع شدہ مدت سے بھرپور فائدہ اٹھائیں اور اگر ان کا نام ووٹر لسٹ میں درج نہیں ہے یا کسی قسم کی تصحیح درکار ہے تو مقررہ مدت کے اندر ضروری درخواست ضرور جمع کرائیں تاکہ آئندہ انتخابات میں اپنے حقِ رائے دہی سے محروم نہ رہیں۔

الیکشن کمیشن نے واضح انتباہ بھی جاری کیا ہے کہ ووٹر لسٹ میں نام شامل کرانے، ترمیم کرانے یا نام حذف کرانے کے لیے اگر کوئی شخص جان بوجھ کر غلط معلومات فراہم کرتا ہے یا جھوٹا حلف نامہ جمع کراتا ہے تو اس کے خلاف انتخابی قوانین کے تحت قانونی کارروائی عمل میں لائی جا سکتی ہے۔