مہاراشٹر: جالنہ میں انکم ٹیکس محکمہ کی چھاپہ مار کارروائی

پانچ کاروباری گروپوں کے ٹھکانوں پر کارروائی میں 390 کروڑ کے بے نامی اثاثے ضبط

مہاراشٹر کے جالنہ میں محکمہ انکم ٹیکس نے 5 کاروباری گروپوں کے مقامات سے تقریباً 390 کروڑ روپے کے بے نامی اثاثے ضبط کیے ہیں۔  چھاپے میں 58 کروڑ روپے نقد، 32 کلو سونے کے زیورات، 16 کروڑ روپے کے ہیرے اور موتی برآمد ہوئے۔ انکم ٹیکس ڈیپارٹمنٹ کی ٹیم کو نوٹوں کی گنتی میں تقریباً 13 گھنٹے لگے۔ محکمہ انکم ٹیکس کے ذرائع کے مطابق یہ کارروائی یکم سے 7 اگست تک ایس آر جے اسٹیل، کالیکا اسٹیل، ایک کوآپریٹو بینک، فائنانسر ومل راج بورا، ڈیلر پردیپ بورا کی فیکٹری، مکان اور دفاتر پر کی گئی۔  یہ اطلاع جمعرات کو میڈیا کو دی گئی۔ پوری ٹیم ایک جلوس کی شکل میں شہر میں داخل ہوئی۔ گاڑیوں پر شادی کے اسٹیکر چسپاں کیے گئے تھے۔ کچھ پر لکھا تھا- دلہنیا ہم لے جائیں گے جو اس آپریشن کا کوڈ ورڈ تھا۔

اس کارروائی میں انکم ٹیکس محکمہ کے 260 افسر اور ملازمین شامل تھے. جو 120 سے زیادہ گاڑیوں میں سوار ہو کر آئے تھے. پانچ الگ الگ ٹیموں نے ایک ہی وقت میں اس آپریشن کو انجام دیا. محکمہ انکم ٹیکس نے اس معاملے میں ٹیکس چوری کے شبہات ظاہر کئے ہیں. محکمہ انکم ٹیکس کی ٹیم کو ابتدائی تحقیقات میں کچھ نہیں ملا۔  بعد ازاں جالنہ سے 10 کلومیٹر دور ایک تاجر کے فارم ہاؤس پر بھی کارروائی کی گئی۔ یہاں ایک الماری کے نیچے، بستر کے اندر اور دوسری الماری میں تھیلوں میں رکھے نوٹوں کے بنڈل ملے۔ نوٹوں کو اسٹیٹ بینک آف انڈیا کی مقامی برانچ میں لے جا کر شمار کیا گیا۔ انہیں گننے میں 10 سے 12 مشینیں لگیں۔کپڑوں کے 35 تھیلوں میں نوٹوں کے بنڈل رکھے گئے تھے۔

محکمہ انکم ٹیکس کی ٹیم نے چھاپے کو انتہائی خفیہ رکھا۔ تمام احتیاطی تدابیر اختیار کی گئیں۔ اس کے لیے ٹیم نے اپنی گاڑیوں پر دلہا اور دلہن کے نام کے اسٹیکر چسپاں کیے تھے، تاکہ معلوم ہو سکے کہ یہ گاڑیاں کسی شادی میں جا رہی ہیں۔ اس آپریشن کے دوران ہر کوئی 'دلہنیا ہم لے جائیں گے' کوڈ ورڈ میں بات کر رہا تھا۔