سدھیر چودھری نے زی نیوز سے استعفیٰ دیا

اپنے نجی معاملات کو استعفیٰ کی اہم وجہ قرار دی، اپنا ذاتی کاروبار شروع کرنے کا ارادہ ظاہر کیا

زی نیوز کے ایڈیٹر ان چیف اور سی ای او سدھیر چودھری نے اپنے عہدے سے استعفیٰ دے دیا ہے. ایسل گروپ کے چیئرمین سبھاش چندر کو لکھے گئے اپنے استعفیٰ نامے میں سدھیر چودھری نے کہا کہ یہ فیصلہ میرے ذاتی معاملات پر مبنی ہے، مجھے اپنا ذاتی کاروبار شروع کرنا ہے. سدھیر بادل ناخواستہ کمپنی سے علیحدگی اختیار کرنے پر سبھاش چندر سے آشیرواد بھی لیا. انہوں نے مزید کہا کہ میں آپ کو یقین دلاتا ہوں کہ میرا مجوزہ نیا منصوبہ (اگر کامیاب ہوا) تو آپ کو خوشی ہوگی اور مجھ پر فخر محسوس ہوگا.
چودھری نے اپنے کیریئر کا آغاز زی سے کیا اور تقریباً تین دہائیوں سے ٹی وی نیوز انڈسٹری میں کام کر رہے ہیں۔ 2003 میں انہوں نے زی نیوز چھوڑ دیا اور سہارا میں شمولیت اختیار کی۔ انہوں نے کمپنی کے ہندی نیوز چینل سہارا وقت کو شروع کرنے میں اہم کردار ادا کیا۔ بعد ازاں وہ انڈیا ٹی وی سے بھی مختصر مدت کے لیے وابستہ رہے۔2012 میں چودھری نے دوبارہ زی نیوز میں شمولیت اختیار کی اور اپنے پرائم ٹائم شو ڈیلی نیوز اینڈ اینالیسس (ڈی این اے) کی میزبانی شروع کی۔  یہ شو بے حد مقبول ہوا تاہم کئی مواقع پر اس شو کو تنقید کا سامنا کرنا پڑا.