مولانا عمر گوتم کا بیٹا عبداللہ گوتم بھی گرفتار

یوپی اے ٹی ایس نے نوئیڈا سے حراست میں لیا، تبدیلئ مذہب سنڈیکیٹ سے منسلک ہونے اور بیرون ممالک سے آنے والے فنڈ کو مذہب تبدیل کرنے والوں میں تقسیم کرنے کا الزام

لکھنئو: اترپردیش پولیس کی اے ٹی ایس نے غیر قانونی تبدیلی مذہب معاملے میں کارروائی کرتے ہوئے مولانا عمر گوتم کے بیٹے عبداللہ گوتم کو گرفتار کرلیا ہے۔اطلاعات کے مطابق پولیس نے عبداللہ کو نوئیڈا سے گرفتار کیا ہے۔

یہ بھی پڑھیں:۔۔۔تریپورہ معاملہ: تریپورہ اِز برننگ لکھنے والے صحافی پر یو اے پی اے کے تحت نوٹس.html

پولیس کے مطابق تبدیلی مذہب سنڈیکیٹ معاملے میں غیر ملکی فنڈنگ کی تفتیش میں یوپی اے ٹی ایس نے عمر گوتم اور ان کے ساتھیوں کو بیرون ملک سے حوالہ اور دیگر ذرائع سے 57 کروڑ روپے فنڈنگ کی اطلاع سامنے آئی تھی۔عمر گوتم اور ان کے ساتھی اس فنڈ کے اخراجات کی تفصیل مہیا نہیں کرسکے تھے۔بحث کے دوران یہ پتہ چلا کہ عمر گوتم کا بیٹا عبداللہ گوتم ساکن کے-47 باٹلہ ہاؤس جامعہ نگر نئی دہلی مولانا عمر گوتم کے سنڈیکیٹ سے منسلک ہے اور مذہب تبدیل کرنے والے لوگوں کو پیسہ تقسیم کرنے کے کام کی دیکھ ریکھ کرتا ہے۔عبداللہ اس سنڈیکیٹ کے معاون جہانگیر عالم، قیصر اور فراز شاہ سے براہ راست جڑا ہوا ہے اور مولانا عمر گوتم کے زیر انتظام ال فاروقی مدرسہ و مسجد اور اسلامی دعوت سینٹر( آئی ڈی سی) کے انتظامات دیکھتا ہے۔عبداللہ کے اکاؤنٹ میں بھی انہیں ہی ذرائع سے رقم آئی تھی جن سے مولانا عمر گوتم کے اکاؤنٹ میں رقم آئی تھی۔عبداللہ کے مختلف بینک اکاؤنٹس میں اب تک 75 لاکھ روپے جمع ہونے کی تصدیق ہوئی ہے جن میں لگ بھگ 17 لاکھ روپے بیرون ممالک سے آئے ہیں۔یہ بھی الزام عائد کیا گیا ہے کہ عبداللہ اپنے والد اور دیگر معاونین کے ساتھ مل کر مذہب تبدیل کرنے والوں میں یہ رقم تقسیم کرتا تھا۔