مسافروں سے بھری بس پر چٹان گری، متعدد مسافر ملبے میں دب گئے

ہماچل کے کِنّور میں لینڈ سلائیڈنگ سے خوفناک حادثہ، بڑے پیمانے پر راحت رسانی آپریشن جاری، 30 افراد کی تلاش، دو کی موت ،متعدد زخمی

ہماچل پردیش کے کِنّور میں اندوہناک حادثہ پیش آیا۔ لینڈ سلائیڈنگ کے سبب مسافروں سے بھری ہوئی ایک بس ملبے میں دب گئی۔بس کے علاوہ دو کاریں بھی حادثہ کا شکار ہوگئیں۔ایسا امکان ظاہر کیا جارہا ہے کہ قریب 40 لوگ ملبے میں دبے ہوئے ہیں۔ہماچل حکومت کی جانب سے ابھی تک صرف ایک شخص کی موت کی تصدیق کی گئی ہے۔جبکہ 6 افراد زخمی ہیں۔اس کے علاوہ 25 سے 30 افراد اب تک لاپتہ ہیں جن کی تلاش جاری ہے۔یہ حادثہ کنور ضلع کے چورا میں واقع ہائے وے پر چٹانیں کھسکنے کے سبب پیش آیا ہے۔

اب تک حادثہ کی شکار بس کے ڈرائیور سمیت 9 لوگوں کو بچایا جاچکا ہے۔ڈرائیور کے مطابق لینڈ سلائیڈنگ کے سبب کچھ کاریں ستلج ندی میں جاگریں۔این ڈی آر ایف کی 25 نفوس پر مشتمل ٹیم جائے حادثہ پر پہنچ کر راحت رسانی میں مصروف ہے۔ٹیم سخت مشکلات میں راحت رسانی کا کام انجام دے رہی کیونکہ پہاڑ سے اب بھی پتھر گر رہے ہیں جس کے سبب کافی دقت کا سامنا کرنا پڑ رہا ہے۔

یہ بھی پڑھیں:۔۔۔جنتر منتر پر مسلم مخالف نعرے بازی معاملہ میں اشوینی اپادھیائے سمیت پانچ ملزمین گرفتار

وزیراعظم نریندر مودی نے ہماچل کے وزیراعلی جے رام ٹھاکر سے فون پر رابطہ کیا اور ان سے اس حادثہ کی معلومات لی۔وزیراعظم نے جے رام کو ہر ممکن مدد کا یقین دلایا ہے۔واضح رہے کہ حادثہ کی شکار بس کنّور سے شملہ کی سمت جارہی تھی، بس کے ڈرائیور اور کنڈکٹر بھی اس حادثے میں زخمی ہوئے ہیں۔