مالیگاؤں: مڈڈے ہوٹل کے قریب پولیس کی کارروائی میں 40 تلواریں ضبط

غیر قانونی طور پر فروخت کے مقصد سے لائی جارہی تلواروں کا ذخیرہ ضبط، تین افراد گرفتار جبکہ ایک فرار, پوار واڑی پولیس اسٹیشن میں معاملہ درج

مالیگاؤں: ممبئی آگرہ قومی شاہراہ نمبر 3 پر واقع مڈڈے ہوٹل کے قریب خصوصی پولیس دستے کی کارروائی میں 40 تیز دھار تلواریں ضبط کی گئی ہیں۔ اس کارروائی میں خصوصی پولیس دستے نے تین افراد کو گرفتار کیا ہے۔مذکورہ کارروائی کل بروز منگل شام پانچ بجے کی گئی۔ایڈیشنل سپریٹنڈنٹ آف پولیس چند کانت کھنڈوی کو ذرائع سے اطلاع موصول ہوئی تھی کہ شہر میں کچھ نوجوان غیرقانونی طور فروخت کے مقصد سے اسلحہ لے جارہے ہیں۔موصولہ اطلاعات کی بنا پر ایڈیشنل سپریٹنڈنٹ آف پولیس چند کانت کھنڈوی نے خصوصی پولیس دستے کے سربراہ سب انسپکٹر آر کے گھوگے کو کارروائی کرنے کی ہدایت دی تھی۔سب انسپکٹر گھوگے نے قومی شاہراہ پر مڈڈے ہوٹک کے قریب کھلے میدان میں جال بچھایا۔ایک مشتبہ رکشا نمبر ایم ایچ 41 اے ٹی 0907 کو روک کر تلاشی لی گئی تو تیز دھار تلواریں برآمد ہوئیں۔رکشا میں بیٹھے ہوئے محمد آصف شاکر احمد، عرفان احمد حبیب احمد اور عتیق احمد سلیم احمد کو گرفتار کرلیا گیا۔جبکہ محمد محمود عبدالرشید نامی شخص موقع سے فرار ہوگیا۔رکشا کی تلاشی لی گئی تو اس میں سے 44 ہزار روپے مالیت کی 40 تیز دھار تلواریں برآمد ہوئیں۔ پولیس نے تلواروں سمیت 50 ہزار روپے کی رکشا، 14 ہزار روپے مالیت کے دو موبائل اور مجموعی طور پر ایک لاکھ 8 ہزار روپے مالیت کی اشیاء ضبط کرلی۔پولیس اہلکاروں پنکج بھوئے، پرکاش بنکر، بھوشن خیرنار اور سندیپ راٹھوڑ نے اس کارروائی میں حصہ لیا۔  اس سلسلے میں پوارواڑی پولیس اسٹیشن میں مقدمہ درج کیا گیا ہے۔