شہر میں بڑھتے حادثات.... مولانا عمرین کی اہم اپیل

 

سرپرست اپنے بچوں کی نگرانی کریں اور نوجوان احتیاط کریں، جان بہت قیمتی ہے: مولانا عمرین

مالیگاؤں: شہر مالیگاؤں میں گزشتہ چند روز میں کئ حاثات پیش آئے جن میں متعدد نوجوان جاں بحق ہوئے، اس سلالے میں سلسلے میں حضرت مولانا عمرین محفوظ رحمانی کا بیان سامنے آیا ہے. مولانا عمرین نے کہا کہ شہر مالیگاؤں میں حادثات کی کثرت (خصوصاً تہواروں کے موقع پر) تشویشناک ہے. مولانا نے کہا کہ ظاہر ہے کہ تقدیر کا لکھا کوئی ٹال نہیں سکتا لیکن احتیاط اور حفاظتی تدابیر کرنا ضروری ہے. ہمارے نوجوان جس طرح سے سیر و تفریح کیلئے جاتے ہیں اور جس طرح سے موٹرسائیکل چلاتے ہیں جس سے نقصان کا خدشہ ہوتا ہے اس سے احتیاط کرنا نہایت ضروری ہے. جان بہت قیمتی ہے، جس خاندان کا کوئی فرد یا نوجوان اس طرح کے حادثات کا شکار ہوکر جان گنوا دیتا ہے اس کے خاندان کیلئے ایک بڑے دکھ اور صدمے کا باعث ہوتا ہے. ایک مدت تک گھر کے لوگ سنبھل نہیں پاتے.

مولانا عمرین نے مزید کہا کہ گزشتہ دو تین روز میں ہمارے کچھ نوجوان سڑک حادثہ کا شکار ہوئے اور شہید ہوئے اور ان میں سب نوعمر تھے. ان سے انکے گھر والوں کو بہت امہدیں وابستہ رہی ہونگی. کہیں ایسا ہوتا ہے کہ گھر میں کمانے والا ایک ہی ہوتا ہے اور وہ حادثے میں اس طرح رخصت ہوگیا. یہ پورے گھر اور خاندان کیلئے حد درجہ دکھ، رنج اور صدمے کی مشکل اور پریشانی کی بات ہوتی ہے. اس صورتحال کو سامنے رکھتے ہوئے ہمارے عزیزوں اور نوجوانوں کو احتیاط برتنی چاہیے.

مولانا عمرین نے شہر کی عوام کو پیغام دیا کہ زیادہ وقت گھر پر گزاریں، شہر میں رہیں، بلا کسی ضرورت باہر نا جائیں اور باہر جائیں تو زیادہ رات تک باہر نہ رہیں  احتیاط کے ساتھ گاڑی چلائیں. تیز رفتاری سے اور ہنگامہ کرتے ہوئے گاڑی چلانے سے حادثات کی شرح اور اسکے امکانات بڑھ جاتے ہیں.

مولانا عمرین نے نوجوانوں سے اپیل کی کہ اس معاملے میں احتیاط کریں. انہوں نے کہا کہ سرپرستوں کی ذمہ داری ہے کہ وہ اپنی اولاد اور اپنے گھر کے بچوں کی نگرانی کریں اور انہیں تلقین کریں، ان کو پابند کریں ان پر نظر رکھیں. اگر گھر کے بڑے اس معاملے پر سنجیدگی سے توجہ دیں گے تو اس کے خاطرخواہ نتائج برآمد ہوں گے.

مولانا نے حادثات میں شہید ہونے والے بچوں کے اہل خانہ سے تعزیت کرتے ہوئے انہیں صبر کی تلقین بھی کی.