سیمسنگ کا ایک ٹی بی اسٹوریج والا موبائل متعارف کرانے کا منصوبہ

گلیکسی ایس 22 الٹرا تین مختلف ویرئینٹ میں جلد ہی لانچ ہوگا، ریم 12 سے 16 جی بی تک ہوگی

اسمارٹ فون بنانے والی کورین کمپنی سیمسنگ نے 1 ٹیرا بائٹ (ٹی بی) میموری کا حامل فون متعارف کرانے کی تیاری شروع کردی۔چینی میڈیا رپورٹ کے مطابق سیمسنگ کی جانب سے رواں سال گلیکسی ایس 22 الٹرا متعارف کرایا جائے گا جو میموری کے اعتبار سے مختلف ہوگا۔

یہ بھی پڑھیں:۔۔۔مردوں کی شرٹ کے بٹن دائیں ، خواتین کے بائیں طرف کیوں لگے ہوتے ہیں؟

ایس 22 الٹرا کی اپنی میموری 1 ٹی بی ہوگی جبکہ اس میں علیحدہ سے میموری کارڈ کی سلاٹ بھی دی جائے گی، اگر ریم کی بات کی جائے تو فون کے حساب سے یہ 12 اور 16 جی بی تک ہوگی۔یہ بات بھی سامنے آئی کہ صارفین کی سہولت کو مدنظر رکھتے ہوئے سیمسنگ نے اسی ماڈل میں 128، 256 اور 512 جی بی والے فون بھی تیار کرنے کا فیصلہ کیا ہے، جن کی قیمتیں میموری اور ریم کے اعتبار سے مختلف ہوں گی۔

سیمسنگ کی جانب سے اس سیریز کے 3 فون گلیکسی ایس 22، ایس 22 پلس اور ایس 22 الٹرا متعارف کرائے جائیں گے۔ جن میں 8 جنریشن اسینپ ڈریگن چپ پراسیسر نصب کیا جائے گا، جو موبائل کی رفتار کو تیز رکھنے میں مدد فراہم کرے گا۔ایس 22 سیریز کی اب تک لیک ہونے والی تصاویر کو دیکھ کر ایسا محسوس ہوتا ہے کہ اس کے ساتھ صارفین کی سہولت کے لیے ٹچ پین بھی دیا جائے گا۔ کمپنی کی جانب سے اب تک فون کی قیمت اور مارکیٹ میں دستیابی کی تاریخ کا اعلان نہیں کیا گیا۔

اس سے قبل سیمسنگ کی جانب سے 2019 میں گلیکسی ایس 10 موبائل متعارف کرایا گیا تھا، جس کی اپنی اسٹوریج1 ٹی بی تھی جبکہ اس میں علیحدہ سے  میموری کارڈ کی سلاڈ بھی دی گئی تھی۔