مالیگاؤں: پستول و کارتوس کے ساتھ نوجوان گرفتار

عائشہ نگر کامگار کالونی سے 22سالہ نوجوان گرفتار، دیسی پستول سمیت دو زندہ کارتوس ضبط، ملزم کو تین دنوں کی پولیس تحویل

مالیگاؤں: عائشہ نگر کامگار کالونی نوری ہال کے سامنے سے پولیس نے ایک نوجوان کو  پستول و کارتوس کے ساتھ حراست میں لیا۔ اس تعلق سے عائشہ نگر پولیس اسٹیشن کے انچارج پی آئی سریش کمار نے بتایا کہ آج نوجوان میں پستول رکھنے کا رجحان بڑھتا جارہا ہے۔نوجوان اپنے آپ کو دوسرے سے الگ ثابت کرنے کیلئے اس طرح کے معاملات میں ملوث پائے جارہے ہیں۔ وہ شوق اور شہرت کے لیے پستول رکھ کر گھومتے ہے اور عام لوگوں کو بتا کر ڈر کا ماحول پیدا کرنے کی کوشش کرتے ہیں۔انہوں نے بتایا کہ گزشتہ روز کامگار کالونی نوری ہال کے سامنے سے  سید آصف سید ساجد نامی22 سالہ نوجوان کو گرفتار کیا گیا ہے۔ 

پولیس نے اس نوجوان کے قبضے سے 26 ہزار 500 روپے مالیت کی ایک دیسی پستول اور دو زندہ کارتوس برآمد کئے ہیں۔پولیس کانسٹیبل شام شنکر پوار کی شکایت پر اندراج نمبر 424/21 ، دفعہ 3/25 کے تحت مقدمہ درج کیا گیا ہے۔اس معاملے میں ملزم کو عدالت میں پیش کیا گیا جہاں مقامی عدالت کے معزز جج نے دیسی پستول اور کارتوس رکھنے کے الزام میں گرفتار سید آصف سید ساجد کو تین دنوں کی پولیس کسٹڈی میں بیھجنے کا حکم دیا ہے۔