مالیگاؤں: شانِ ہند،ساجدہ میڈم سمیت جنتادل کے متعددکارکنان پر مقدمہ درج

لاک ڈاؤن گائیڈ لائن اور دفعہ 144 کی خلاف ورزی کرتے ہوئے ہجوم جمع کرنے کی پاداش میں 70 خواتین پر بھی مقدمہ

مالیگاؤں: لاک ڈاؤن کی خلاف ورزی کرنے پر جنتادل سیکولر کے 81 کارکنان پر مقدمہ درج کیا گیا۔ پولیس کنٹرول روم سے ملی تفصیلات کے مطابق ریاستی حکومت نے کورونا وائرس کے چلتے ریاست بھر میں لاک ڈاؤن اور دفعہ 144 نافذ کرنے کے احکامات جاری کیے ہیں۔حکومت کی نئی گائیڈ لائن کے تناظر میں پولیس انتظامیہ سختی سے عمل کرتے ہوئے کارروائی کررہی ہے۔جس کی وجہ سے شہر کی معاشی حالت دن بہ دن بگڑتی جا رہی ہیں۔اس سلسلے میں گزشتہ روز جنتادل سیکولر کی کار گزار صدر شان ہند نہال احمد کی قیادت میں خواتین نے قدوائی روڈ بازار علاقے میں لاک ڈاؤن کی مخالفت کرتے ہوئے احتجاج کیا اور ہاتھوں میں نو لاک ڈاؤن کے بینر لے کر حکومت اور انتظامیہ کے خلاف نعرے بازی کی۔اس تعلق سے سٹی پولیس اسٹیشن میں فریادی پولیس سپاہی بلہ نمبر 1955 ویلاس رمش سوریہ ونشی نے شکایت کی کہ ملزمین ساجدہ نہال احمد, شان ہند نہال احمد، محمد مستقیم ڈگنیٹی، پروفيسر رضوان امان اللہ وغیرہ گیارہ مرد اور 70 خواتین نے غیر قانونی طور سے جماؤ بندی کی اور لاک ڈاؤن کے خلاف ورزی کرتے ہوئے لوگوں کا ہجوم جمع کیا اس پر پولیس نے تمام ملزمین کے خلاف قلم  219 / 2021 / 188 / 269 / 270/ 135 / 37 / 1 / 3 /3 / 4 /5 / کے تحت مقدمہ درج کرلیا۔