رائل یونیورسل اسکول کی انوکھی ترنگا ریلی، قومی شاہراہ پر پولیس نے طلباء و اساتذہ کا استقبال کیا

مالیگاؤں (پریس ریلیز) آزادی کا امرت مہوتسو کے تحت انتظامیہ کی جانب سے ایم ایس جی کالج گراؤنڈ پر مختلف ثقافتی پروگرام کے علاوہ اجتماعی طور پر راشٹریہ گیت پڑھنے کے لئے خصوصی پروگرام منعقد کیا گیا۔آزادی کا امرت مہوتسو کے تحت جہاں 13 تا 15 اگست کے درمیان 'ہر گھر ترنگا مہم' چلائی جا رہی ہے اسی طرح سوراج مہوتسو کے موقع پر اجتماعی طور پر راشٹریہ گیت پڑھنے کا فیصلہ کیا گیا۔ جس کے تحت انتظامیہ نے شہر میں واقع ایم ایس جی کالج گراؤنڈ پر خصوصی پروگرام منعقد کیا۔ جہاں پروگرام میں ضلع بھر کے متعدد اسکولوں کے ہزاروں طلباء، اساتذہ، سرپرست، سرکاری دفاتر کے اعلیٰ افسران و ملازمین کے علاوہ عوامی نمائندے اور سماجی شخصیات نے شرکت کی اور اجتماعی طور پر راشٹریہ گیت پڑھا۔

وہیں اس موقع پر خاتون ایجوکیشنل سوسائٹی کے زیر اہتمام جاری رائل یونیورسل اسکول (CBSE) کے طلباء و اساتذہ نے پرنسپل سید ظہیر کی رہنمائی میں عبدالمطلب کیمپس سے قومی شاہراہ نمبر 3 پر واقع ٹریفک پولیس اسٹیشن تک ترنگا ریلی نکالی۔ اس ریلی کے اختتام پر پرنسپل سید ظہیر نے بتایا کہ اس ریلی کو خاص طور پر قومی شاہراہ نمبر 3 سے اسلئے نکالا گیا ہیکہ شہر میں ہر کوئی اس مہم کا اہتمام کررہا ہے لیکن شہر کے مضافاتی علاقوں میں لوگوں میں بیداری پیدا کرنے کیلئے اس ریلی کا آغاز عبدالمطلب کیمپس سے لیکر قومی شاہراہ تک کیا گیا۔

موصوف نے مزید کہا کہ ہائی وے سے گزرنے والے بیرون شہروں کے لوگوں نے بھی اس ریلی کا استقبال کیا جبکہ ٹریفک پولیس ملازمین نے بھی طلباء کی سرہانہ کی اور ٹریفک سے متعلق تمام حفاظتی اقدامات کیے۔ اس دوران سید ظہیر نے چیئرمین رضوان عبدالمطلب اور ریحان عبدالمطلب کی جانب سے تمام طلبہ وطالبات اور اساتذہ کو آزادی کا امرت مہوتسو 75 سالہ جشن آزادی کی مبارکباد پیش کرتے ہوئے کہا کہ عبدالمطلب کیمپس میں 15 اگست بروز پیر صبح 9 بجے پرچم کشائی چیئرمین رضوان عبدالمطلب کے ہاتھوں ادا کی جائے گی۔ اور رائل یونیورسل اسکول (CBSE) کے طالبات مختلف ثقافتی پروگرام و حب الوطنی گیت پیش کریں گے۔ رسم پرچم کشائی اور پروگرام میں سرپرست و شہریان سے شرکت کی گزارش کی۔