ٹی ای ٹی بدعنوانی معاملہ : 7880 بوگس اساتذہ کی فہرست تیار

او ایم آر شیٹ کی جانچ میں بڑا خلاصہ، نااہل امیدواروں کو ایک لاکھ سے ڈھائی لاکھ روپے تک لے کر سرٹیفکیٹ دیئے گئے، کارروائی کا امکان

پونے: ٹی ای ٹی امتحان بدعنوانی معاملہ منظر عام پر آنے کے بعد بھرتی کے پورے عمل پر سوالیہ نشان لگ گیا ہے۔ پونے پولس نے اس سے قبل امتحانی کونسل کے چیئرمین اور محکمہ تعلیم کے کچھ ارکان و آفیسران کو گرفتار کیا ہے۔ اس کے بعد ایک اور اہم انکشاف ہوا ہے۔  پونے پولس ٹی ای ٹی امتحان بدعنوانی کی تیزی سے تحقیقات کر رہی ہے۔ اس ضمن میں گذشتہ دنوں پونے پولس نے 7880 بوگس اساتذہ کا انکشاف کیا تھا ۔اس ضمن میں پولس نے بوگس ٹیچرز کی فہرست مرتب کر لی ہے۔ جس سے ریاست میں 7880 بوگس اساتذہ کے خلاف کارروائی کئے جانے کا امکان ہے۔

یہ بھی پڑھیں:۔۔۔سنجے گاندھی نرآدھار یوجنا وظیفہ یافتگان کیلئے بینکوں میں خصوصی کاونٹر لگانے کا مطالبہhi-Naradhar-Yojana.html

ایجوکیشن کونسل کے کمشنر نے یہ انکشاف کیا کہ 7,800 نااہل امیدوار ٹی ای ٹی امتحان میں اہل قرار دیئے گئے جن میں مختلف اقسام کی بددیانتی کی گئی تھی۔ پولیس کی تفتیش میں یہ نتیجہ اخذ کیا گیا کہ نااہل امیدواروں سے فی کس 1 لاکھ سے 2.5 لاکھ روپے طلب کرتے ہوئے سرٹیفکیٹ دیے گئے۔  اس کے بعد بوگس اساتذہ کی فہرست تیار کی گئی ہے۔ پونے سائبر پولیس 2019-20 میں ٹی ای ٹی امتحان گھوٹالے کی تحقیقات کر رہی ہے۔

نیز امتحان دینے والوں کی او ایم آر شیٹس کی جانچ کی گئی اور معلوم ہوا کہ کل 7880 نااہل امیدواروں کو اہل بنانے کے لیے ان کے بنیادی نمبروں (مارکس) میں اضافہ کیا گیا۔ پولیس کمشنر امیتابھ گپتا نے گزشتہ جمعہ 28 جنوری کو صحافیوں کو بتایا کہ بوگس امیدواروں کی تعداد میں مزید اضافہ ہو سکتا ہے۔