ورچوول کرنسیوں کے اشتہارات پر پابندی کا فیصلہ اب تک نہیں کیا گیا: نرملا سیتا رمن

کابینہ کی منظوری کے بعد کرپٹو کرنسی بل پیش کیا جائے گا، اس کے علاوہ این ایف ٹی پر بھی بات کی جائے گی: وزیر مالیات

نئی دہلی: وزیر مالیات نرملا سیتا رمن نے آج راجیہ سبھا میں کہا کہ ملک میں ورچوول کرنسی (کریپٹو کرنسی) سے متعلق بل کابینہ کی منظوری کے بعد آئے گا، لیکن کرپٹو سے متعلق مختلف ذرائع پر آنے والے اشتہارات پر پابندی لگانے کا فیصلہ ابھی تک نہیں کیا گیاہے۔

یہ بھی پڑھیں:۔۔۔این آر سی کے نفاذ پر اب تک حتمی فیصلہ نہیں لیا گیا ہے: وزارت داخلہ

وقفہ سوالات کے دوران ایوان میں ضمنی سوالات کے جواب میں سیتا رمن نے کہا کہ یہ ایک جوکھم بھرا کام ہے اور مکمل ریگولیٹری فریم ورک نہیں ہے۔ اس کے اشتہارات پر پابندی کا کوئی فیصلہ نہیں کیا گیا۔ ریزرو بینک آف انڈیا اور سیبی کے ذریعے لوگوں میں بیداری لانے کی کوشش کی گئی ہے۔ انہوں نے کہا کہ ورچوول کرنسیاں بھی ناپسندیدہ سرگرمیوں کی حوصلہ افزائی کر سکتی ہیں، اس لیے اس پر کڑی نظر رکھی جائے گی۔انہوں نے کہا کہ حکومت اس کے لیے ایک بل لانے کی تیاری کر رہی ہے جس میں پرانے بل کے ساتھ نئی دفعات بھی ہوں گی۔اس سلسلے میں بی جے پی کے سشیل کمار مودی کے ذریعے پوچھے گئے ضمنی سوال پر وزیر مالیات نے کہا کہ نان فنجیبل ٹوکن (این ایف ٹی) کے اصول پر بھی بات کی جائے گی۔