مالیگاؤں: قریش جماعت کے نمائندہ وفد کی ناسک رینج انسپکٹر جنرل آف پولیس سے ملاقات

 

اجازت یافتہ جانوروں کی نقل وحمل میں ہونے والی پریشانیوں کو دور کرنے کا مطالبہ، آئی جی نے تعاون کی یقین دہانی کرائی

مالیگاؤں: عیدالضحی کے پیش نظر سابق رکن اسمبلی آصف شیخ کی قیادت میں قریش جماعت کے نمائندہ وفد نے ناسک رینج انسپکٹر جنرل آف پولیس سے ملاقات کی۔

اس موقع پر آصف شیخ نے انسپکٹر جنرل آف پولیس (آئے جی) سروتی دورجے سے کہا کہ آئندہ ماہ عیدالضحی کے موقع پر مسلمانان شہر قربانی کا فریضہ انجام دیتے ہیں اور انہیں اس کیلئے جانور ذبح کرنا ضروری ہوتا ہے اس لئے عیدالضحی کے ایام میں جانوروں کی آمدورت کا سلسلہ بڑھ جاتا ہے۔اس دوران جانوروں کی نقل وحمل میں انہیں شدید تکالیف کا سامنا کرنا پڑ رہا ہے۔ انہوں نے کہا کہ حکومت نے گائے کے ذبیحہ پر پابندی عائد کی ہے۔جس کی پاسداری کرنا ہر شہری کا فرض ہے۔لیکن یہ قانون گائے کی نسل کے جانوروں کو چھوڑ کر دیگر مویشیوں میں بھینسوں کو ذبح کرنے کی اجازت دیتا ہے۔

مالیگاؤں شہر میں ذبیحہ کیلئے دھولیہ، جلگاؤ‍ں، نندور بار اضلاع سے بھینسوں کو لایا جارہا ہے۔شیخ آصف نے انسپکٹر جنرل آف پولیس سے کہا کہ یہ علاقے انکے دائرہ اختیار میں آتے ہیں۔دھولیہ، جلگاؤ‍ں اور نندوربار اضلاع کے ساتھ ساتھ اندور، ایم پی سمیت دیگر ریاستوں سے مالیگاؤں کیلئے بھینسوں کی آمدورفت کے دوران ان علاقوں میں پولیس انتظامیہ رکاوٹ پیدا کررہا ہے۔اس موقع پر ناسک ضلع دیہی پولیس سُپریٹینڈینٹ سچن پاٹل بھی موجود تھے۔  

شیخ آصف نے کہا کہ ان کی درخواست ہے کہ دھولیہ ، نندوربار اور جلگاؤں اضلاع کے تمام پولیس سپرنٹنڈنٹ کو گائے کے گوشت کی روک تھام ایکٹ کے علاوہ بھینسوں کی نقل و حمل میں رکاوٹ نہ ڈالنے کا حکم دیا جائے۔کیونکہ گائے ممنوع قانون میں بھینسوں کا ذکر نہیں ہے انہیں اس قانون سے مستثنیٰ رکھا گیا ہے۔لہذا مالیگاؤں آنے والی جانور بردار گاڑیاں جس میں بھینسوں کو لایا جاتا ہے اس کو روکا نہ جائے۔

انہوں نے کہا کہ ان اضلاع میں ڈیوٹی پر تعینات پولیس آفیسران کو حکم دیں کہ وہ بھینسوں کی نقل و حمل کرنے والی گاڑیوں کو نہ روکیں اور نہ ہی انہیں کسی قسم کی کوئی تکالیف کا سامنا کرنا پڑے اس بات کا خاص خیال رکھا جائے۔اس موقع پر قریشی جماعت کے نمائندوں نے میڈیا سے گفتگو کرتے ہوئے کہا کہ قریش برادری کے افراد صرف قانونی طور اجازت یافتہ جانور کی ہی نقل و حمل کریں گائے اور گائے کی نسل کے ممنوعہ جانوروں کا کاروبار نہ کریں۔قریش جماعت کے مطالبات کو سننے کے بعد انسپکٹر جنرل آف پولیس (آئے جی) سروتی دورجے نے تعاون کی یقین دہائی کرائی ہے۔