منسکھ ہیرین کو راستے سے ہٹانے کیلئے سچن وازے نے پردیپ شرما کو خطیر رقم ادا کی تھی: این آئی اے کی چارج شیٹ میں الزام
این آئی اے نے 10 ہزار صفحات پر مشتمل چارج شیٹ داخل کی، چونکانے والے انکشافات، منسکھ کو ٹھکانے لگانے کی ذمہ داری پردیپ شرما کو سونپی گئی تھی
نئی دہلی:اینٹیلیا معاملہ اور منسکھ ہیرین قتل معاملہ میں قومی تفتیشی ایجنسی(این آئی اے)کے ذریعے داخل کی گئی فرد جرم سے اس بات کا خلاصہ ہوا کہ منسکھ کو راستے سے ہٹانے کیلئے ملزم سچن وازے نے سابق انکاؤنٹر اسپیشلسٹ اور شیوسینا لیڈر پردیپ شرما کو خطیر رقم ادا کی تھی۔این آئی اے نے ان دونوں معاملات میں وازے اور شرما سمیت دس افراد کو ملزم قرار دیا ہے۔
یہ بھی پڑھیں: ۔۔۔تامل ناڈو اسمبلی میں شہریت ترمیمی قانون کے خلاف قرارداد منظور
این آئی اے کے ذریعے داخل کی گئی 10 ہزار صفحات پر مشتمل چارج شیٹ میں کہا گیا کہ 3 مارچ 2021 کو ملزم سچن وازے نے شام کے وقت پی ایس فاؤنڈیشن کاریالیہ اندھیری ممبئی میں پردیپ شرما سے ملاقات کی اور ریگزن کا ایک بیگ دیا جس میں 500 کے نوٹوں کے کئی بنڈل تھے۔تفتیش کے دوران جمع کئے گئے ثبوت اس بات کی تصدیق کرتے ہیں۔چارج شیٹ سے یہ بھی سامنے آیا کہ جب وازے کو علم ہوا کہ اینٹیلیا معاملہ کی تفتیش کسی اور کو سونپی جارہی ہے تو اس نے منسکھ ہیرین پر دباؤ بنایا کہ وہ اس جرم کی ذمہ داری قبول کرلے۔اس نے منسکھ سے یہ بھی کہا کہ اسے اس معاملے میں فوری ضمانت مل جائے گی۔لیکن منسکھ نے اس تجویز کو مسترد کردیا۔واضح رہے کہ اس معاملے میں منسکھ ہی واحد ایسا شخص تھا جسے پوری سازش کا علم تھا۔
چارج شیٹ کے مطابق جب وازے کو لگا کہ منسکھ کمزور کڑی ثابت ہوسکتا ہے اور تفتیش کاروں کے سامنے منہ کھول سکتا ہے تو اس نے منسکھ کو راستے سے ہٹانے کی منصوبہ بندی کر ڈالی۔چارج شیٹ میں کہا گیا کہ تفتیش کے دوران اس بات کا پتہ چلا کہ وازے اور شرما نے منسکھ ہیرین کو ختم کرنے کیلئے دیگر لوگوں کے ساتھ مل کر سازش رچی۔ہیرین کو ٹھکانے لگانے کا کام شرما کو سونپا گیا۔واضح رہے کہ صنعت کار مکیش امبانی کی رہائش اینٹیلیا کے پاس 25 فروری کو دھماکہ خیز مادہ سے بھری گاڑی پائی گئی تھی۔بعد میں اس گاڑی کے مالک منسکھ ہیرین کا قتل ہوگیا۔اس کی لاش تھانے ضلع کے سمندر کی کھاڑی میں ملی۔اینٹیلیا معاملے میں سچن وازے کو این آئی اے نے مارچ میں گرفتار کیا تھا۔وہ اس معاملے میں کلیدی ملزم ہے۔قتل معاملہ میں نام آنے کے بعد اسے کرائم انٹلیجنس یونٹ سے ہٹاکر ممبئی پولیس ہیڈ کوارٹر میں منتقل کردیا گیا تھا، اس کے بعد مئی 2021 میں اسے ملازمت سے برخاست کردیا گیا۔خبررساں ایجنسی پی ٹی آئی کے مطابق اینٹیلیا کے باہر دھماکہ خیز مادہ سے بھری گاڑی برآمد ہونے کے بعد مکیش امبانی کی بیوی نیتا امبانی نے گجرات کا سفر رد کردیا تھا۔یہ اطلاع اینٹیلیا کے چیف سکیورٹی گارڈ نے این آئی اے کو دی۔وہیں اینٹیلیا کے پاس کام کرنے والے ایک سکیورٹی گارڈ نے این آئی اے کو بتایا کہ اس واقعے سے علاقے کا ماحول یکسر تبدیل ہوگیا اور لوگ خوفزدہ ہوگئے۔
این آئی اے نے اپنی چارج شیٹ میں یہ بھی کہا کہ سچن وازے نے اس واردات کے دن اپنے سرکاری ڈرائیور سے کہا تھا کہ یہ گاڑی کھڑی کرنا ایک خفیہ آپریشن ہے۔این آئی اے کو دیئے گئے اپنے بیان میں اینٹیلیا کے سکیورٹی ہیڈ نے کہا کہ دھماکہ خیز مادہ کے ساتھ گاڑی اور ایک خط موصول ہونے کے بعد انہوں نے فوری طور پر مکیش امبانی کو اس کی اطلاع دی۔اس دن نیتا امبانی کو گجرات کے جام نگر کے سفر پر روانہ ہونا تھا لیکن زونل ڈی سی پی کی صلاح پر انہوں نے سفر کا ارادہ ترک کردیا۔
