ضمیر نے ملزم کو اعتراف جرم پر مجبور کردیا
تھانے: دوست کے قتل کے بعد تقریباً 20 روز تک مقتول دوست کے خواب میں نظر آنے کا دعویٰ کرنے والے ایک شخص نے بالآخر اپنے ضمیر کی خلش کے باعث تھانے پولیس کے سامنے جرم کا اعتراف کر لیا۔
پولیس کے مطابق ملزم کی شناخت پربھو کرکاڈے (24) کے نام سے ہوئی ہے، جبکہ مقتول کی شناخت پلّو عرف وشال کدم (43) کے طور پر کی گئی ہے۔ یہ واقعہ ڈومبیولی مغرب کے موتھاگاؤں علاقے میں پیش آیا۔
اطلاعات کے مطابق پربھو کرکاڈے اور اس کا دوست وشال کدم ایک مکان میں ساتھ بیٹھ کر شراب پی رہے تھے۔ اسی دوران دونوں کے درمیان کسی بات پر بحث شروع ہوگئی۔ دیکھتے ہی دیکھتے یہ بحث شدید جھگڑے میں تبدیل ہوگئی اور مبینہ طور پر غصے میں آکر پربھو کرکاڈے نے اپنے ہی دوست کو قتل کر دیا۔
قتل کے بعد ملزم گھبرا گیا اور اس نے اپنے مکان مالک سندیش مہاتر ے کو واقعے کی اطلاع دی۔ الزام ہے کہ مکان مالک نے پولیس کو اطلاع دینے کے بجائے ملزم کو مشورہ دیا کہ اگر وہ اس معاملے میں پھنس گیا تو اس کی زندگی برباد ہو جائے گی، خصوصاً اس لیے کہ ابھی اس کی شادی بھی نہیں ہوئی ہے۔
اس کے بعد دونوں نے مبینہ طور پر جرم چھپانے کا منصوبہ بنایا۔ انہوں نے مقتول کی لاش کو ایک بوری میں بھرا اور اسے ایک ویران مقام پر لے جا کر ندی کی کھاڑی (کریک) کے قریب پھینک دیا، تاکہ قتل کا سراغ نہ مل سکے۔
بیس دن تک خواب میں آتا رہا مقتول دوست
تاہم قتل کے بعد ملزم پربھو کرکاڈے مبینہ طور پر شدید ذہنی دباؤ اور احساسِ جرم میں مبتلا ہوگیا۔ اس کا دعویٰ تھا کہ تقریباً 20 دن تک اس کا مقتول دوست بار بار خواب میں آتا رہا۔ اس کیفیت کے باعث وہ ٹھیک سے سو بھی نہیں پا رہا تھا۔
بالآخر ضمیر کی خلش اور ذہنی پریشانی سے تنگ آکر پربھو کرکاڈے خود تھانے کرائم برانچ کے دفتر پہنچا اور وہاں اپنے دوست کے قتل کا اعتراف کر لیا۔
پولیس نے دونوں ملزمین کو کیا گرفتار
ملزم کے اعتراف کے بعد کرائم برانچ نے اسے اپنی تحویل میں لیا اور مزید کارروائی کے لیے وشنو نگر پولیس کے حوالے کر دیا۔
سینئر پولیس انسپکٹر رام چوپڑے نے تصدیق کی ہے کہ پولیس نے قتل اور لاش کو ٹھکانے لگانے کے معاملے میں پربھو کرکاڈے اور اس کے مکان مالک سندیش مہاتر ے، دونوں کو گرفتار کر لیا ہے۔
پولیس اس معاملے کی مزید تفتیش کر رہی ہے تاکہ قتل کے اصل حالات اور دونوں ملزمین کے کردار کی مکمل تفصیلات سامنے آسکیں۔