دو سال کی عمر سے روزانہ چالیس سگریٹ پینے والے بچے نے سگریٹ نوشی چھوڑ دی

بچہ سگریٹ نہ ملنے پر دیواروں پر سر مارتا تھا اور خود کو نقصان پہنچاتا تھا، حکومتی اداروں کی مدد سے بچے کی بری لت چھوٹ گئی

سماترا: چند برس پہلے ایک صحت مند دوسالہ بچے کی ویڈیو اور تصاویر دنیا بھر کے سوشل میڈیا پر وائرل ہوئی تھیں جن میں وہ نہایت ماہرانہ انداز میں سگریٹ پیتا نظر آرہا تھا۔ اب سات برس کی عمر میں اسی بچے نے سگریٹ نوشی کی عادتِ بد سے جان چھڑالی ہے۔

یہ بھی پڑھیں:۔۔۔سعودی اداکارہ اریج عبداللہ اپنے فلیٹ پر مردہ پائی گئی

انڈونیشیا کے علاقے سماترا میں پیدا ہونے والے آردی رضال جب دوبرس کا تھا تو اسے سگریٹ کی لت لگ گئی تھی۔ یہاں تک کہ وہ لوگوں سے سگریٹ مانگ کر پیا کرتا تھا اور اس کے والدین بھی اس سے پریشان تھے۔

2017 میں شروع ہونے والی اس تباہ کن عادت سے وہ منہ موڑ چکا ہے اور اب نہ صرف وزن کم کیا ہے بلکہ بہت تندرست دکھائی دیتا ہے۔ دوسے تین سال کی عمر میں اس بچے کو تمباکونوشی کے ساتھ ساتھ روزانہ کئی لیٹر چکنائی بھرا دودھ پینے کی عادت بھی لاحق ہوچکی تھی۔

آردی نے بتایا کہ سگریٹ کی شدید طلب میں نشہ پورا نہ ہونے پر اس کا منہ کڑوا ہوجاتا تھا اور سر چکرانے لگتا تھا۔ اب میں خوش ہوں اور مجھے تازگی کا احساس ہوتا ہے۔

آردی کی والدہ کے مطابق 18 ماہ کی عمر میں اس کے والد نے پہلا سگریٹ اسے دیا تھا لیکن اس کی طلب بڑھتی گئی۔ یہاں تک کہ تمباکونوشی نہ کرنے کی وجہ سے وہ دیواروں پر سر مارنے لگا اور اس نے خود کو نقصان پہنچانا شروع کردیا اور دن میں 40 سگریٹ تک ختم کرنے لگا۔ ساتھ ہی وہ غیرصحت بخش غذائیں بھی کھانے لگا تھا۔

اس کی ویڈیو وائرل ہونے کے بعد حکومتی اداروں اور بحالی کے اسپتالوں نے بچے کے والدین سے رابطہ کیا اور اس کی مدد کی۔ طویل علاج کے بعد اب وہ تندرست ہوچکا ہے۔