ملک بھر میں پاپولر فرنٹ آف انڈیا کے دفاتر پر این آئی اے، ای ڈی اور اے ٹی ایس کے چھاپے

ممبئی : 22 ستمبر: پاپولر فرنٹ آف انڈیا کے ملک بھر کے دفاتر میں آج این آئی اے  اور ای ڈی نے چھاپہ مار کارروائی شروع کی ہے. ملک بھر کی 10 ریاستوں میں یہ چھاپہ ماری جاری ہیں۔ اس سلسلے میں متعدد افراد کو گرفتار کیا گیا ہے۔

اس سلسلے میں  میڈیا ذرائع سے موصول اطلاعات کے مطابق  پونہ کے کوثر گارڈن سے دو افراد کو گرفتار کیا گیا۔ ان میں قیوم شیخ اور پی ایف آئی مہاراشٹر کے سکریٹری رازی احمد خان کے نام ہیں۔ ناسک میں درج مقدمہ کی بنیاد پر مذکورہ کارروائی کی گئی ہے۔ان دونوں پر ملک دشمن سرگرمیوں میں ملوث ہونے کا الزام عائد کیا گیا ہے۔ 

اسی طرح مالیگاؤں سے ایک شخص کو حراست میں لیا گیا ہے۔ اس کا نام سیف الرحمان بتایا گیا ہے۔ مہاراشٹر، پونے، نوی ممبئی اور بھونڈی میں بھی چھاپے جاری ہیں۔ اس کارروائی کو فی الحال خفیہ رکھا گیا ہے۔ لہذا ، ابھی تک سرکاری معلومات سامنے نہیں آئیں۔ مہاراشٹر میں پی ایف آئی کا مرکزی دفتر پونہ کے کونڈھوا میں ہے۔ یہ بھی بتایا گیا ہے کہ کچھ جگہوں پر تربیتی مراکز چلائے جارہے ہیں۔

یہ کارروائی دہشت گردانہ سرگرمیوں، دہشت گردی کو مالی اعانت، دہشت گردوں کے لئے تربیتی کیمپ لگانے، اور نوجوانوں کی بھرتی جیسے الزامات کے تحت کی جارہی ہے۔ 

متعدد افراد کو گرفتار کرنے کے علاوہ ، این آئی اے نے ڈیجیٹل گیجٹ ، دستاویزات ، کچھ اسلحہ اور نقد رقم بھی ضبط کی ہے۔ موصولہ اطلاعات کے مطابق، نوی ممبئی کے ڈاروے  گاؤں میں بھی چھاپے مارے گئے ہیں۔ پچھلے 6 گھنٹوں میں، ممبئی میں کارروائی کی اطلاع ملی ہے۔ پاپولر فرنٹ آفس، نوی ممبئی میں واقع دفتر پر چھاپہ مارا گیا ہے اور نیرول سیکٹر 23 میں ڈاروے کے دفتر میں کارروائی کی گئی ہے۔ 

ملک بھر کی صورتحال؟

این آئی اے نے منگلورو میں پی ایف آئی اور سوشل ڈیموکریٹک پارٹی آف انڈیا (ایس ڈی پی آئی) کے دفاتر پر چھاپہ مارا۔یہاں بھی دو افراد کو تحویل میں لیا گیا۔ اس کارروائی کے دوران پی ایف آئی تنظیم کے ورکر کارروائی کے خلاف احتجاج کرتے ہوئے دیکھے گئے۔