بلقیس بانو کیس: اگر ایسی مثال قائم کی جائے گی تو مستقبل میں انصاف کی کوئی امید نہیں: ممتاز پٹیل

بلقیس بانو اجتماعی عصمت ریزی معاملہ کے 11 مجرمین کی رہائی پر ممتاز پٹیل کا ردعمل، امید ہے کہ نربھیا معاملے کی طرح اس معاملے پر بھی لوگوں کا ردعمل سامنے آئے گا

سینئر کانگریس لیڈر مرحوم احمد پٹیل کی بیٹی ممتاز پٹیل نے بلقیس بانو گینگ ریپ کیس کے تازہ فیصلے پر تبصرہ کرتے ہوئے کہا کہ اگر ایسی مثال قائم کی جائے تو مستقبل میں انصاف کی کوئی امید نہیں ہے۔

 انڈیا ٹوڈے سے بات کرتے ہوئے ممتاز پٹیل نے کہا کہ وہ گجرات ہائی کورٹ اور حکومت کے فیصلے سے پوری طرح مایوس ہیں۔ انہوں نے خواتین کو بااختیار بنانے کے بارے میں وزیر اعظم نریندر مودی کے خیالات کی نشاندہی کی کیونکہ یہ فیصلہ ان کی یوم آزادی کی تقریر کے فوری بعد آیا۔

ممتاز پٹیل نے اس ضمن میں وزیراعظم نریندر مودی کو خط لکھا ہے. 

ممتاز پٹیل نے کہا کہ عصمت دری جیسے جرم کیلئے عمر قید کی سزا بھی کافی نہیں ہے اور 75 ویں یوم آزادی پر مجرمین کو رہا کرنا زیادہ افسوسناک اور ناقابل قبول ہے.

2012 نربھیا معاملے کو یاد کرتے ہوئے ممتاز پٹیل نے کہا کہ ملک کی خواتین نے متحد ہوکر نربھیا معاملے میں احتجاج کیا تھا، مجھے امید ہے کہ اس معاملے میں بھی اسی کا طرح کا ردعمل سامنے آئے گا. پٹیل نے مزید کہا کہ یہ معاملہ خواتین کا ہے، یہ ہمارے تحفظ سے متعلق ہے. انہوں نے امید ظاہر کی کہ مرکز اس معاملے پر ضرور توجہ دے گا اور سپریم کورٹ مداخلت کرے گی.