عالمی یوم اردو کے موقع پر اردو میڈیا سینٹر پر بزم اردو کا اہتمام

صحافیوں، ادباء اور شعراء کا استقبال، اردو زبان کی آبیاری کیلئے مستقبل قریب میں میڈیا سینٹر کے زیرِاہتمام مزید تقاریب کے انعقاد کا عزم

ہر سال 9 نومبر (اقبال ڈے) یومِ اردو کے طور پر منایا جاتا ہے۔ بیک وقت دنیا کے مختلف خطوں میں منائے جانے کی وجہ سے 9 نومبر عالمی یومِ اردو سے موسوم کیا جاتا ہے۔ اسی مناسبت سے گزشتہ کل بعد نماز عشاء رات 9 بجے ضلع اردو پترکار سنگھ و اردو میڈیا سینٹر کی جانب سے اردو میڈیا سینٹر پر بعنوان بزم اردو کا انعقاد کیا گیا۔اس پروگرام کی صدارت اردو میڈیا سینٹر کے صدر اسماعیل شیخ نے کی۔ 

یہ بھی پڑھیں:۔۔۔سمیر وانکھیڈے کے اہل خانہ کی گرونر بھگت سنگھ کوشیاری سے ملاقات.html

اس موقع پر شہر کے سنیئر و بزرگ صحافی لطیف جعفری، معروف ادیب سلیم جہانگیر، مشہور افسانہ نگار ہارون اختر، مشہور شاعر انیس نیّر، ڈرامہ نگار سراج دلار، صحافی افتخار احمد (کرائم رپورٹر) اور نوجوانوں کے نمائندہ شاعر فرحان دل کے علاوہ اردو میڈیا سینٹر پر اپنی بےلوث خدمات انجام دینے والے اعجاز احمد نے شرکت کی۔ان تمام شخصیات کو اردو ادب کیلئے ان کی خدمات کے عوض شال و گلوں کا نذرانہ پیش کیا گیا۔اسی کے ساتھ اردو صحافیوں اور اردو اخبارات کے نمائندوں کا بھی استقبال کیا گیا۔

اس موقع پر ڈرامہ نگار و سابق مدرس سراج دلار نے اردو زبان و ادب کی اہمیت اور ضرورت بتاتے ہوئے کہا کہ آج عالمی یوم اردو کے موقع پر میڈیا سینٹر پر اس تقریب کا انعقاد قابل ستائش ہے۔انہوں نے اردو داں طبقہ کے ساتھ ساتھ ان غیر مسلم اور غیر اردو طبقہ سے تعلق رکھنے والے افراد کو بھی آئندہ تقریبات میں مدعو کرنے کا مشورہ دیا جو اردو زبان و ادب سے شغف رکھتے ہیں اور کسی نہ کسی درجہ میں اردو زبان کی خدمت کرتے ہیں۔اس کے علاوہ میڈیا سینٹر پر اردو زبان سکھانے کا نظم کرنے کا بھی مشورہ دیا۔

افسانہ نگار ہارون اختر نے کہا کہ ہندوستان کی کرنسی پر دس زبانوں میں روپے کی قیمت درج کی گئی ہے جس میں اردو بھی شامل ہے لیکن دسویں نمبر پر اردو زبان ہونے سے ہمیں مایوس ہونے کی ضرورت نہیں کیونکہ اردو بنیاد کا پتھر ہے اسلئے سب سے نیچے درج کی گئی ہے۔ تاہم شیخ زاہد (بیباک) نے نظامت کے فرائض انجام دیئے جبکہ صابر گوہر نے اس تقریب کے اغراض و مقاصد بیان کئے۔ یوسف ترجمان نے رسم شکریہ ادا کیا۔ احسان الرحیم، شہزاد اختر( میدانِ صحافت)، منصور اکبر، مختارعدیل، امتیاز خلیل، خلیل عباس (شامنامہ) شکیل پترکار، جمال احمد (شہریار)، پترکار جمال شیخ، عزیر الرحمن، شیخ احمد منّا(آواز ِصداقت)، عبداللہ انصاری (ای ٹی وی بھارت)، ریحان اختر (دی رپورٹرس ویو) اور دیگر معززین شہر اور اخبارات و میڈیا نمائندوں نے شرکت کی۔