روش کمار نے این ڈی ٹی وی سے استعفیٰ دیا

چینل نے بذریعہ میل روش کے استعفیٰ کا اعلان کیا، عالمی شہرت یافتہ صحافی کو نئے سفر کیلئے نیک خواہشات

این ڈی ٹی وی انڈیا کے سینئر ایگزیکٹو ایڈیٹر روش کمار نے استعفیٰ دے دیا ہے۔  روش کمار کئی پروگراموں کی میزبانی کرتے تھے جن میں چینل کے فلیگ شپ ویک ڈے شو ہم لوگ، روش کی رپورٹ، دیس کی بات، اور پرائم ٹائم شامل ہیں۔

روش کمار ملک کے لوگوں کو متاثر کرنے والے مسائل کی اپنی بنیادی کوریج کے لیے جانے جاتے ہیں۔ انہیں دو بار رامناتھ گوئنکا ایکسیلنس ان جرنلزم ایوارڈ اور 2019 میں رامون میگسیسے ایوارڈ سے نوازا گیا ہے۔

یہ اعلان کرتے ہوئے چینل نے ایک میل میں کہا کہ استعفیٰ فوری طور پر نافذ العمل ہے۔

لوگوں کو متاثر کرنے والے چند مخصوص صحافیوں میں روش کمار کا شمار ہوتا ہے. اپنی صحافت سے انہوں نے ہر کسی کو متاثر کیا اور لوگوں کی توجہ کا مرکز بنے۔  ہندوستان اور بین الاقوامی سطح پر انہیں باوقار ایوارڈز سے سرفراز کیا گیا اور بین الاقوامی سطح پر انہوں نے اپنی منفرد شناخت بنائی.

میل میں لکھا گیا کہ روش کمار کئی دہائیوں سے NDTV کا ایک لازمی حصہ رہے ہیں. ان کی شراکت بہت زیادہ رہی ہے، اور ہم جانتے ہیں کہ وہ کامیاب ہوں گے جب وہ ایک نئی شروعات کریں گے.